ടീമുകൾ പുനഃസംഘടിപ്പിക്കുന്നതിന്റെയും ആയിരക്കണക്കിന് ജീവനക്കാരെ എഐ (AI) അധിഷ്ഠിത പ്രൊജക്ടുകളിലേക്ക് മാറ്റുന്നതിന്റെയും ഭാഗമായി മെറ്റാ (Meta) കമ്പനി ഈ ആഴ്ച വീണ്ടും പിരിച്ചുവിടലിന് (Layoffs) പദ്ധതിയിടുന്നു. തങ്ങളുടെ പുനഃസംഘടന നടപടികളുടെ ഭാഗമായാണ് ആഗോളതലത്തിൽ ജീവനക്കാരുടെ എണ്ണം കുറയ്ക്കാൻ കമ്പനി തീരുമാനിച്ചിരിക്കുന്നത്. തിങ്കളാഴ്ച ജീവനക്കാരുമായി പങ്കുവെച്ച ആഭ്യന്തര കുറിപ്പിൽ (Memo), എഐ പ്രവർത്തനങ്ങൾ മെച്ചപ്പെടുത്തുന്ന ലക്ഷ്യത്തോടെയുള്ള സംഘടനാപരമായ മാറ്റങ്ങളെക്കുറിച്ച് മാർക്ക് സക്കർബർഗിന്റെ നേതൃത്വത്തിലുള്ള കമ്പനി വിശദീകരിച്ചു.
റോയിട്ടേഴ്സ് (Reuters) റിപ്പോർട്ട് ചെയ്ത ഈ മെമ്മോ പ്രകാരം, കമ്പനിയിലെ മാനേജീരിയൽ തസ്തികകൾ വെട്ടിക്കുറച്ചുകൊണ്ട് ഏകദേശം 7,000 ജീവനക്കാരെ എഐയുമായി ബന്ധപ്പെട്ട പുതിയ പ്രൊജക്ടുകളിലേക്ക് മാറ്റാൻ പദ്ധതിയിടുന്നതായി മെറ്റായുടെ ചീഫ് പീപ്പിൾ ഓഫീസർ ജനീൽ ഗെയ്ൽ ജീവനക്കാരെ അറിയിച്ചു. ഇതിന് പുറമെ പല വിഭാഗങ്ങളിലെയും ലീഡർമാർ തങ്ങളുടെ ടീമുകളിലെ സംഘടനാപരമായ മാറ്റങ്ങൾ ഉടൻ പ്രഖ്യാപിക്കുമെന്നും ഗെയ്ൽ കൂട്ടിച്ചേർത്തു.
ജീവനക്കാരെ മാറ്റാൻ ഉദ്ദേശിക്കുന്ന പുതിയ പദ്ധതികളിൽ ‘അപ്ലൈഡ് എഐ എഞ്ചിനീയറിംഗ്’ (AAI), ‘ഏജന്റ് ട്രാൻസ്ഫോർമേഷൻ ആക്സിലറേറ്റർ’ (ATA) XFN എന്നിവയും, മെറ്റാ സിടിഒ (CTO) ആൻഡ്രൂ ബോസ്വർത്ത് നേരത്തെ പ്രഖ്യാപിച്ച മറ്റ് രണ്ട് ടീമുകളും ഉൾപ്പെടുന്നു.
