ഓട്ടവ: കാനഡയിലേക്ക് എത്തുന്ന ഫ്രഞ്ച് ഭാഷാ കുടിയേറ്റക്കാരുടെ എണ്ണത്തിൽ 2025-ൽ വൻ വർധനവുണ്ടായതായി ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറത്തുവിട്ട ഏറ്റവും പുതിയ ഡാഷ്ബോർഡ് റിപ്പോർട്ട് വ്യക്തമാക്കുന്നു. കെബെക്ക് പ്രവിശ്യക്ക് പുറത്തുള്ള കാനഡയുടെ മറ്റ് ഭാഗങ്ങളിലേക്ക് എത്തിയ ഫ്രഞ്ച് ഭാഷാ കുടിയേറ്റക്കാരുടെ എണ്ണം സർക്കാർ നിശ്ചയിച്ചിരുന്ന ലക്ഷ്യമായ 8.5 ശതമാനവും കടന്ന് 8.9 ശതമാനത്തിലെത്തി (29,630 സ്ഥിരതാമസക്കാർ – PR). 2021-ൽ ഇത് വെറും 2.0 ശതമാനം മാത്രമായിരുന്നു എന്നത് ഈ വളർച്ചയുടെ വ്യാപ്തി വ്യക്തമാക്കുന്നു.
ഇത്തരത്തിൽ കാനഡയിലെത്തുന്ന ഫ്രഞ്ച് ഭാഷാ കുടിയേറ്റക്കാരിൽ ഭൂരിഭാഗവും (84.8%) ആഫ്രിക്ക, മിഡിൽ ഈസ്റ്റ് രാജ്യങ്ങളിൽ നിന്നുള്ളവരാണ്. ഇതിൽ 11,935 സ്ഥിരതാമസക്കാരുമായി ആഫ്രിക്കൻ രാജ്യമായ കാമറൂൺ ആണ് ഒന്നാം സ്ഥാനത്ത് നിൽക്കുന്നത്. അൾജീരിയ, മൊറോക്കോ, ഫ്രാൻസ്, കോട്ട് ഡി ഐവയർ എന്നിവയാണ് തൊട്ടടുത്ത സ്ഥാനങ്ങളിലുള്ള മറ്റ് രാജ്യങ്ങൾ. കാനഡയിലെത്തിയവരിൽ ഭൂരിഭാഗം പേരും (24,655 പേർ) ‘ഇക്കണോമിക് ക്ലാസ്സ്’ വഴിയാണ് രാജ്യത്തേക്ക് പ്രവേശിച്ചത്. പ്രവിശ്യകളിൽ എക്സ്പ്രസ്സ് എൻട്രി വഴി ഏറ്റവും കൂടുതൽ ആളുകളെ സ്വീകരിച്ചത് ഒന്റാരിയോയും ആൽബർട്ടയുമാണ്.
കുടിയേറ്റക്കാരുടെ പ്രിയപ്പെട്ട നഗരമായി മാറിയിരിക്കുന്നത് തലസ്ഥാനമായ ഓട്ടവയാണ്. ടൊറന്റോയെക്കാൾ കൂടുതൽ ആളുകൾ തങ്ങളുടെ പുതിയ താമസസ്ഥലമായി തിരഞ്ഞെടുത്തത് ഓട്ടവയെയാണ്. ഇങ്ങനെ എത്തുന്ന ഫ്രഞ്ച് ഭാഷാ കുടിയേറ്റക്കാരെ പ്രാദേശിക സമൂഹങ്ങളുമായി എളുപ്പത്തിൽ ലയിപ്പിക്കുന്നതിനായി കാനഡയിലുടനീളം 14 പ്രത്യേക ‘വെൽകമിങ് ഫ്രാങ്കോഫോൺ കമ്മ്യൂണിറ്റികൾ’ (WFC) സ്ഥാപിച്ച് നിരവധി സാമൂഹിക സാംസ്കാരിക പരിപാടികൾ സർക്കാർ നടപ്പിലാക്കി വരുന്നുണ്ട്. കാനഡയിലെ ഫ്രഞ്ച് സംസ്കാരവും ഫ്രഞ്ച് സംസാരിക്കുന്നവരുടെ ജനസംഖ്യയും കൂടുതൽ ശക്തമാക്കാൻ ഈ പദ്ധതികൾ സഹായിക്കുമെന്നാണ് വിലയിരുത്തപ്പെടുന്നത്.
