ഓട്ടവ: പ്രമുഖ ബ്രാൻഡുകളുടെ ഓർഗാനിക് മൈക്രോ ഗ്രീനുകൾ E. coli ബാക്ടീരിയ ബാധ സാധ്യതയെ തുടർന്ന് വിപണിയിൽ നിന്ന് തിരിച്ചുവിളിക്കുന്നു . കാനഡ ഫുഡ് ഇൻസ്പെക്ഷൻ ഏജൻസിയാണ് (CFIA) Kyan Culture, ഫാം ബോയ് എന്നീ ബ്രാൻഡുകൾക്ക് കീഴിൽ വിറ്റഴിക്കപ്പെട്ട 65 ഗ്രാമിന്റെ പാക്കറ്റുകൾ തിരിച്ചുവിളിക്കാൻ നിർദ്ദേശം നൽകിയത്. മെയ് 19-നും 22-നും ഇടയിൽ കാലാവധി അവസാനിക്കുന്ന ബ്രോക്കോളി, മൈൽഡ് മിക്സ്, സ്പ്രിങ് മിക്സ് എന്നീ ഓർഗാനിക് മൈക്രോ ഗ്രീൻ ഉൽപ്പന്നങ്ങൾക്കാണ് നിലവിൽ വിലക്കേർപ്പെടുത്തിയിരിക്കുന്നത്.
ഈ ഉൽപ്പന്നങ്ങൾ കാനഡയിലെ ഒന്റാരിയോ, കെബെക് എന്നീ പ്രവിശ്യകളിലാണ് പ്രധാനമായും വിറ്റഴിക്കപ്പെട്ടിട്ടുള്ളതെന്ന് ഫുഡ് ഇൻസ്പെക്ഷൻ ഏജൻസി വ്യക്തമാക്കി. ‘ഇ. കോളി’ ബാക്ടീരിയ ബാധിച്ച ഭക്ഷണസാധനങ്ങൾ ശരീരത്തിൽ എത്തിയാൽ കടുത്ത ആരോഗ്യപ്രശ്നങ്ങൾക്ക് കാരണമാകും. ഈ ഉൽപ്പന്നങ്ങൾ ഉപയോഗിക്കുന്നത് വഴി ഓക്കാനം, ഛർദ്ദി, കഠിനമായ വയറുവേദന, വയറിളക്കം എന്നിവ ഉണ്ടാകാൻ സാധ്യതയുണ്ടെന്ന് ഏജൻസി മുന്നറിയിപ്പ് നൽകി.
എന്നാൽ, ഈ ഉൽപ്പന്നങ്ങൾ കഴിച്ചതുമൂലം ആർക്കെങ്കിലും ഇതുവരെ ആരോഗ്യപ്രശ്നങ്ങൾ ഉണ്ടായതായി റിപ്പോർട്ട് ചെയ്യപ്പെട്ടിട്ടില്ല. നിലവിൽ ഈ ബ്രാൻഡുകളുടെ മൈക്രോ ഗ്രീൻ പാക്കറ്റുകൾ വാങ്ങി വീട്ടിൽ സൂക്ഷിച്ചിട്ടുള്ള ഉപഭോക്താക്കൾ അവ പൂർണ്ണമായും കളയാനോ അല്ലെങ്കിൽ വാങ്ങിയ കടകളിൽ തന്നെ തിരികെ ഏൽപ്പിക്കാനോ തയ്യാറാകണമെന്ന് അധികൃതർ അഭ്യർത്ഥിച്ചു.
