വിദ്യാർത്ഥികൾക്ക് വലിയ ആശ്വാസമേകി, പത്താം ക്ലാസ് തലത്തിൽ മൂന്നാം ഭാഷയ്ക്ക് (R3) ബോർഡ് പരീക്ഷ ഉണ്ടായിരിക്കില്ലെന്ന് സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (CBSE) അറിയിച്ചു. പഠനത്തിൽ കൂടുതൽ ശ്രദ്ധ കേന്ദ്രീകരിക്കുന്നതിനും കുട്ടികളുടെ അനാവശ്യമായ മാനസിക സമ്മർദ്ദം കുറയ്ക്കുന്നതിനുമായി പത്താം ക്ലാസ് തലത്തിൽ R3-ന് ബോർഡ് പരീക്ഷകൾ നടത്തില്ല എന്ന് മെയ് 15-ന് പുറപ്പെടുവിച്ച സർക്കുലറിൽ സി.ബി.എസ്.ഇ വ്യക്തമാക്കിയിട്ടുണ്ട്.
2026 ജൂലൈ 1 മുതൽ ഒൻപതാം ക്ലാസിൽ പുതിയതായി നടപ്പിലാക്കാൻ പോകുന്ന മൂന്നാം ഭാഷയുടെ മൂല്യനിർണ്ണയത്തെക്കുറിച്ചുള്ള അനിശ്ചിതത്വങ്ങൾക്ക് ഈ തീരുമാനത്തോടെ വിരാമമായിരിക്കുകയാണ്. “2026 ജൂലൈ 1 മുതൽ മൂന്ന് ഭാഷകളുടെ (R1, R2, R3) പഠനം നിർബന്ധിതമായിരിക്കും” എന്നും ബോർഡിന്റെ സർക്കുലറിൽ വ്യക്തമാക്കുന്നു.
