എഡ്മിന്റൻ: കാനഡയുടെ രഹസ്യാന്വേഷണ ഏജൻസിയായ കനേഡിയൻ സെക്യൂരിറ്റി ഇന്റലിജൻസ് സർവീസിൽ (CSIS) നിന്ന് നേരിട്ട് വിവരങ്ങൾ സ്വീകരിക്കുന്നതിനുള്ള ഉന്നതതല സുരക്ഷാ അനുമതി പ്രീമിയർ ഡാനിയേൽ സ്മിത്ത് സ്വന്തമാക്കി. പ്രീമിയറുടെ ഓഫീസാണ് ഇക്കാര്യം ഔദ്യോഗികമായി സ്ഥിരീകരിച്ചത്. ഇതോടെ ദേശീയ സുരക്ഷയെ ബാധിക്കുന്ന അതീവ രഹസ്യസ്വഭാവമുള്ള വിവരങ്ങളും വിദേശ ഇടപെടലുകളെക്കുറിച്ചുള്ള റിപ്പോർട്ടുകളും ഔദ്യോഗികമായി വിശകലനം ചെയ്യാൻ പ്രീമിയർക്ക് സാധിക്കും.
ആൽബർട്ടയിൽ വിദേശശക്തികൾ ഏതെങ്കിലും തരത്തിലുള്ള ഇടപെടലുകൾ നടത്തുന്നുണ്ടോ എന്ന് നിരീക്ഷിക്കാൻ പ്രത്യേക അനുമതി വേണമെന്ന് സ്മിത്ത് കഴിഞ്ഞ മാസം ആവശ്യപ്പെട്ടിരുന്നു. ദേശീയ സുരക്ഷയുമായി ബന്ധപ്പെട്ട കാര്യങ്ങളിൽ റോയൽ കനേഡിയൻ മൗണ്ടഡ് പൊലീസ് (RCMP) പ്രവിശ്യാ സർക്കാരിനെ കൃത്യമായി വിവരങ്ങൾ അറിയിക്കുന്നില്ലെന്ന ആശങ്ക നിലനിന്നിരുന്നു. ഈ സാഹചര്യത്തിൽ രഹസ്യാന്വേഷണ ഏജൻസിയുമായി നേരിട്ട് ആശയവിനിമയം നടത്തുന്നത് പ്രവിശ്യയുടെ സുരക്ഷ ഉറപ്പാക്കാൻ അനിവാര്യമാണെന്ന് പ്രീമിയർ വ്യക്തമാക്കി.
ആൽബർട്ടയിലെ വിഘടനവാദ പ്രസ്ഥാനങ്ങളെക്കുറിച്ച് വിദേശ രാജ്യങ്ങൾ വ്യാജവാർത്തകളും തെറ്റായ വിവരങ്ങളും പ്രചരിപ്പിക്കുന്നതായി ഈ ആഴ്ച പുറത്തുവന്ന റിപ്പോർട്ടുകൾ ചൂണ്ടിക്കാട്ടുന്നുണ്ട്. ഇത്തരം നീക്കങ്ങൾ പ്രതിരോധിക്കുന്നതിന്റെ ഭാഗമായി, പ്രീമിയർക്ക് പിന്നാലെ ആൽബർട്ട പബ്ലിക് സേഫ്റ്റി മിനിസ്റ്റർ മൈക്ക് എലിസും സി.എസ്.ഐ.എസിന്റെ (CSIS) ഉന്നത സുരക്ഷാ അനുമതിക്കായി അപേക്ഷ നൽകിയിട്ടുണ്ട്.
