ആൽബർട്ടയിലേക്ക് കുടിയേറാൻ ആഗ്രഹിക്കുന്ന ഉദ്യോഗാർത്ഥികൾക്ക് ഇനി മുതൽ അപേക്ഷ സമർപ്പിക്കുന്നത് സൗജന്യമായിരിക്കില്ല. ആൽബർട്ട അഡ്വാന്റേജ് ഇമിഗ്രേഷൻ പ്രോഗ്രാമിന് (AAIP) കീഴിൽ വർക്കർ എക്സ്പ്രഷൻ ഓഫ് ഇൻട്രസ്റ്റ് (WEOI) സമർപ്പിക്കുന്നതിന് 135 ഡോളർ ഫീസ് ഏർപ്പെടുത്തിക്കൊണ്ട് സർക്കാർ ഉത്തരവിറക്കി. ഏപ്രിൽ 7 മുതൽ ഈ പുതിയ നിയമം പ്രാബല്യത്തിൽ വന്നതായും പ്രവിശ്യാ സർക്കാർ അറിയിച്ചു. നേരത്തെ അപേക്ഷ സമർപ്പിക്കുന്നത് സൗജന്യമായിരുന്നുവെങ്കിലും, വർദ്ധിച്ചുവരുന്ന അപേക്ഷകരുടെ എണ്ണം കണക്കിലെടുത്താണ് ഈ പുതിയ തീരുമാനം.
ആൽബർട്ട ഓപ്പർച്യൂണിറ്റി സ്ട്രീം, എക്സ്പ്രസ് എൻട്രി സ്ട്രീം, റൂറൽ റിന്യൂവൽ സ്ട്രീം, ടൂറിസം ആൻഡ് ഹോസ്പിറ്റാലിറ്റി സ്ട്രീം തുടങ്ങി എല്ലാ വർക്കർ പാതകളിലൂടെയും അപേക്ഷിക്കുന്നവർക്ക് ഈ ഫീസ് ബാധകമായിരിക്കും. നിലവിൽ ആൽബർട്ടയിലെ വിവിധ ഇമിഗ്രേഷൻ പൂളുകളിലായി 44,000-ത്തിലധികം പ്രൊഫൈലുകൾ ഉള്ളതായാണ് കണക്കുകൾ സൂചിപ്പിക്കുന്നത്. പുതിയ പ്രൊഫൈൽ സമർപ്പിക്കാൻ നൽകുന്ന 135 ഡോളറിന് പുറമെ, പ്രവിശ്യാ നാമനിർദ്ദേശത്തിന് (Nomination) തിരഞ്ഞെടുക്കപ്പെട്ട ശേഷം സമർപ്പിക്കുന്ന പ്രധാന അപേക്ഷയ്ക്കായി 1,500 ഡോളർ ഫീസ് മുൻപത്തെപ്പോലെ തന്നെ തുടരും.
