കാൽഗറി: മരണത്തിന് മുൻപ് അമ്മയ്ക്ക് നൽകിയ ഒരു വാഗ്ദാനം നിറവേറ്റാനായി 100 കിലോമീറ്റർ ദൂരം ഓടാനൊരുങ്ങി 23 വയസ്സുകാരിയായ മാർസെല്ല സംഗ്രിഗോറിയോ. വെറുമൊരു ഓട്ടമല്ല ഇത്; തന്റെ അമ്മ ലിസ സംഗ്രിഗോറിയോയുടെ ചിതാഭസ്മം അടങ്ങിയ പാത്രവും ചുമലിലേറ്റിയാണ് മാർസെല്ല വടക്കുപടിഞ്ഞാറൻ കാൽഗറിയിൽ നിന്ന് ഗോസ്റ്റ് ലേക്ക് വരെ ഓടുന്നത്. അമ്മയുടെ രണ്ടാം ചരമവാർഷികമായ മാർച്ച് 28-നാണ് ഈ വൈകാരികമായ യാത്ര മാർസെല്ല നിശ്ചയിച്ചിരിക്കുന്നത്. “നമ്മൾ രണ്ടുപേരും കൂടി ഒരു പെൺയാത്ര പോകും” എന്ന് രോഗശയ്യയിലായിരുന്ന അമ്മയ്ക്ക് നൽകിയ വാക്ക് പാലിക്കാനാണ് ഈ മകളുടെ ശ്രമം.
2003-ൽ, മാർസെല്ലയ്ക്ക് വെറും ഒരു വയസ്സുള്ളപ്പോഴാണ് ലിസയ്ക്ക് തലച്ചോറിൽ അർബുദം സ്ഥിരീകരിക്കുന്നത്. പരമാവധി അഞ്ച് വർഷം മാത്രം ആയുസ്സ് പ്രവചിക്കപ്പെട്ട ലിസ, തന്റെ ഇച്ഛാശക്തി കൊണ്ട് 21 വർഷത്തോളം രോഗത്തോട് പോരാടി. തന്റെ ജീവിതകാലം മുഴുവൻ അമ്മയുടെ രോഗാവസ്ഥ കണ്ടാണ് മാർസെല്ല വളർന്നത്. ഒരു സോഷ്യൽ വർക്കറും കായികതാരവുമായിരുന്ന ലിസ, രോഗത്തിന്റെ അവസാന ഘട്ടത്തിൽ പരസഹായമില്ലാതെ എഴുന്നേൽക്കാൻ പോലും വയ്യാത്ത അവസ്ഥയിലായിരുന്നു. 2024 മാർച്ച് 28-നാണ് ലിസ അന്തരിച്ചത്.
തന്റെ ഈ ഓട്ടത്തിന് പേൾ ജാം എന്ന ബാന്റിന്റെ ‘സ്റ്റിൽ എലൈവ്’എന്ന പാട്ടിന്റെ പേരാണ് മാർസെല്ല നൽകിയിരിക്കുന്നത്. അമ്മയ്ക്ക് പ്രിയപ്പെട്ട സംഗീതമായിരുന്നു ചികിത്സാകാലത്തെ പ്രധാന ആശ്വാസം. 100 കിലോമീറ്റർ ദൂരം ഓടുന്നത് അമ്മയുടെ കരുത്ത് തന്നിലുണ്ടെന്ന് തെളിയിക്കാനാണെന്ന് മാർസെല്ല പറയുന്നു. ഭാരമേറിയ ബാഗ് ചുമലിലേറ്റി മാസങ്ങളായി താരം ഇതിനായി പരിശീലനം നടത്തിവരികയാണ്. ദുഃഖം അനുഭവിക്കുന്നവർ ഒറ്റയ്ക്കല്ലെന്നും, മരിച്ചവരെ അവരുടെ രോഗത്തിന്റെ പേരിൽ മാത്രം ഓർക്കരുതെന്നും മാർസെല്ല ലോകത്തെ ഓർമ്മിപ്പിക്കുന്നു. മാർസെല്ലയുടെ അച്ഛൻ മൈക്കും ഈ ഉദ്യമത്തിന് പൂർണ്ണ പിന്തുണയുമായി ഒപ്പമുണ്ട്.
