ടൊറന്റോ: നീണ്ട 15 വർഷത്തെ നിർമ്മാണ പ്രവർത്തനങ്ങൾക്കും അനിശ്ചിതത്വങ്ങൾക്കും ഒടുവിൽ ടൊറന്റോയിലെ എഗ്ലിന്റൺ ക്രോസ്ടൗൺ എൽ.ആർ.ടി (ലൈൻ 5) ജനങ്ങൾക്കായി തുറന്നു കൊടുത്തു. ഞായറാഴ്ച രാവിലെ 7.30-ഓടെയാണ് പാതയിൽ ഔദ്യോഗികമായി സർവീസ് ആരംഭിച്ചത്. ഉദ്ഘാടനത്തോടനുബന്ധിച്ച് ആദ്യ ദിനമായ ഞായറാഴ്ച യാത്രക്കാർക്ക് സൗജന്യ യാത്രയാണ് ടി.ടി.സി (Toronto Transit Commission) ഒരുക്കിയിരുന്നത്.
2011-ൽ നിർമ്മാണം ആരംഭിച്ച ഈ പദ്ധതി 2020-ൽ പൂർത്തിയാകുമെന്നാണ് ആദ്യം പ്രഖ്യാപിച്ചിരുന്നതെങ്കിലും, സാങ്കേതിക തടസ്സങ്ങളും നിയമപോരാട്ടങ്ങളും കോവിഡ് പ്രതിസന്ധിയും കാരണം ആറ് വർഷത്തോളം വൈകുകയായിരുന്നു. മൗണ്ട് ഡെന്നിസ് മുതൽ കെന്നഡി സ്റ്റേഷൻ വരെ 19 കിലോമീറ്റർ ദൂരത്തിലാണ് പുതിയ പാത നീളുന്നത്. 25 സ്റ്റേഷനുകളുള്ള ഈ പാതയിൽ പത്ത് കിലോമീറ്ററോളം ഭൂഗർഭ തുരങ്കത്തിലൂടെയാണ് കടന്നുപോകുന്നത്.
ആദ്യ ഘട്ടത്തിൽ പരിമിതമായ സമയക്രമത്തിലായിരിക്കും സർവീസ് നടത്തുകയെന്ന് അധികൃതർ അറിയിച്ചു. പ്രവൃത്തിദിവസങ്ങളിൽ പുലർച്ചെ 5.30 മുതൽ രാത്രി 11 വരെയും ഞായറാഴ്ചകളിൽ രാവിലെ 7.30 മുതൽ രാത്രി 11 വരെയുമായിരിക്കും ട്രെയിനുകൾ ഓടുക. തിരക്കുള്ള സമയങ്ങളിൽ ഓരോ നാല് മിനിറ്റ് ഇടവിട്ടും ട്രെയിനുകൾ ലഭ്യമാകും. 13 ബില്യൺ ഡോളറിലധികം ചിലവ് വന്ന ഈ പദ്ധതി ടൊറന്റോയിലെ പൊതുഗതാഗത രംഗത്ത് വലിയ മാറ്റങ്ങൾ കൊണ്ടുവരുമെന്നാണ് പ്രതീക്ഷിക്കുന്നത്. പത്തുവർഷത്തിലേറെയായി ഗതാഗതക്കുരുക്കിലും നിർമ്മാണ ബഹളങ്ങളിലും വലഞ്ഞ എഗ്ലിന്റൺ അവന്യൂവിലെ താമസക്കാർക്കും വ്യാപാരികൾക്കും പുതിയ പാതയുടെ വരവ് വലിയ ആശ്വാസമാണ് നൽകുന്നത്.
