വെസ്റ്റ് കോസ്റ്റിലേക്ക് എണ്ണ പൈപ്പ്ലൈൻ നിർമ്മിക്കാനുള്ള കരാറിനെതിരെ ബ്രിട്ടിഷ് കൊളംബിയ പ്രീമിയർ ഡേവിഡ് എബി. പ്രധാനമന്ത്രി മാർക്ക് കാർണിയും ആൽബർട്ട പ്രീമിയർ ഡാനിയേൽ സ്മിത്തും എണ്ണ പൈപ്പ്ലൈൻ നിർമ്മിക്കാനുള്ള കരാറിരിൽ ഒപ്പുവെച്ചതിന് പിന്നാലെ ബിസി സർക്കാർ ഈ നീക്കത്തെ പിന്തുണയ്ക്കില്ലെന്ന് എബി പറഞ്ഞു. കോസ്റ്റൽ ഫസ്റ്റ് നേഷൻസ് വിഭാഗങ്ങളുടെ പിന്തുണയില്ലാതെ പദ്ധതിയുമായി മുന്നോട്ട് പോകില്ലെന്നും അദ്ദേഹം വ്യക്തമാക്കി.
പൈപ്പ് ലൈൻ നിർമാണത്തിൽ ഫെഡറൽ, ആൽബർട്ട സർക്കാരുകൾ ബ്രിട്ടിഷ് കൊളംബിയയെ ചർച്ചയിൽ ഉൾപ്പെടുത്താതെ പദ്ധതി തയ്യാറാക്കിയതിൽ എബി നിരാശ രേഖപ്പെടുത്തി. ഈ പദ്ധതിക്ക് സ്വകാര്യ മേഖലയുടെ പിന്തുണയില്ലെന്നും, 4000 കോടി ഡോളർ നികുതിദായകരുടെ പണം ഉപയോഗിച്ച് മാത്രമേ ഇത് നിർമ്മിക്കാൻ കഴിയൂ എന്നും അദ്ദേഹം ചൂണ്ടിക്കാട്ടി. ഇത് അംഗീകരിക്കാനാവില്ലെന്നും പ്രീമിയർ വ്യക്തമാക്കി. അതേസമയം, ദേശീയ താൽപ്പര്യമുള്ള പദ്ധതിയായി അംഗീകരിക്കുകയും തദ്ദേശീയ പങ്കാളിത്തം ഉറപ്പാക്കുകയും ചെയ്താൽ വെസ്റ്റ് കോസ്റ്റ് ടാങ്കർ നിരോധനം നീക്കാൻ ഫെഡറൽ സർക്കാർ തയ്യാറായേക്കുമെന്നും ധാരണാപത്രത്തിൽ പറയുന്നു.
