കനേഡിയൻ സോഫ്റ്റ്‌വുഡ് വ്യവസായത്തിന് സാമ്പത്തിക സഹായം ഉടൻ ലഭ്യമാക്കുമെന്ന് ഫെഡറൽ വ്യവസായ മന്ത്രി മെലനി ജോളി. യുഎസ് ചുമത്തിയ താരിഫ് മൂലം പ്രതിസന്ധിയിലായ സ്ഥാപനങ്ങൾക്ക് പിടിച്ചുനിൽക്കാൻ വേണ്ടിയാണിതെന്നും മന്ത്രി അറിയിച്ചു. ബിസിനസ് ഡെവലപ്‌മെന്റ് ബാങ്ക് ഓഫ് കാനഡയുടെ (BDC) പിന്തുണയോടെയാണ് ധനസഹായം നൽകുക. രാജ്യത്തെ പ്രമുഖ നിർമ്മാണ പദ്ധതികൾക്ക് കനേഡിയൻ തടി തന്നെ ഉപയോഗിക്കുന്ന നയം രൂപീകരിക്കുമെന്നും മന്ത്രി വ്യക്തമാക്കി.

പുതിയ പദ്ധതി പ്രകാരം തടി വ്യവസായ സ്ഥാപനങ്ങൾക്ക് 70 കോടി ഡോളറി​ന്റെ പുതിയ ടേം ലോണുകളോ ലെറ്റർ ഓഫ് ക്രെഡിറ്റുകളോ ലഭിക്കാൻ എളുപ്പമാകും. ഓഗസ്റ്റിൽ പ്രഖ്യാപിച്ച 125 കോടി ഡോളർ സഹായ പാക്കേജിന്റെ ഭാഗമായാണ് ഈ നീക്കം. തടി വ്യവസായം ദേശീയ സുരക്ഷയുമായി ബന്ധപ്പെട്ട വിഷയമാണെന്നും, തൊഴിലവസരങ്ങൾ സംരക്ഷിക്കാനും മത്സരക്ഷമത വർധിപ്പിക്കാനും ‘ടീം കാനഡ’ പ്രവർത്തിക്കുമെന്നും മന്ത്രി കൂട്ടിച്ചേർത്തു.