കനേഡിയൻ വിനോദസഞ്ചാരിയുടെ പിന്നാലെ ആക്രോശിച്ചുകൊണ്ട് വാഹനത്തിൽ പിന്തുടരുന്ന അമേരിക്കൻ ബോർഡർ ഉദ്യോഗസ്ഥന്റെ വീഡിയോ വൈറലാകുന്നു. ഒരിക്കലും അമേരിക്കയിലേക്ക് തിരിച്ചുവരരുതെന്ന് ഭീഷണി മുഴക്കിയാണ് ഉദ്യോഗസ്ഥൻ വിനോദസഞ്ചാരിയെ പിന്തുടരുന്നത്. ഈ റോഡ് റേജ് വീഡിയോയെക്കുറിച്ച് മാനേജീരിയൽ റിവ്യൂ ആരംഭിച്ചതായി യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ( സിബിപി) അറിയിച്ചു.
39 സെക്കൻഡ് ദൈർഘ്യമുള്ള വീഡിയോയിൽ യൂണിഫോം ധരിച്ച ഒരു ഉദ്യോഗസ്ഥൻ ചാരനിറത്തിലുള്ള പിക്ക-അപ്പ് ട്രക്കിൽ ഒരു കനേഡിയൻ വിനോദസഞ്ചാരിയെ അതിവേഗത്തിൽ പിന്തുടരുന്നത് കാണാം. ഒന്റാരിയോ ലൈസൻസ് പ്ലേറ്റുള്ള വിനോദസഞ്ചാരിയുടെ വാഹനത്തെയാണ് ഉദ്യോഗസ്ഥൻ പിന്തുടർന്നത്. ഇയാളുടെ അടുത്തെത്തിയപ്പോൾ വിൻഡോ താഴ്ത്തി ഒരിക്കലും യുഎസിലേക്ക് തിരിച്ചു വരരുതെന്ന് ആക്രോശിക്കുന്നത് കാണാം. കാനഡ-യുഎസ് അതിർത്തിയിൽ നിന്ന് ഏകദേശം 3 കിലോമീറ്റർ അകലെ ന്യൂയോർക്കിലെ ഇന്റർസ്‌റ്റേറ്റ് 90 ലാണ് സംഭവം നടന്നതെന്ന് വീഡിയോ ചിത്രീകരിച്ച വ്യക്തി പറയുന്നു. സെപ്റ്റംബർ 26നാണ് സോഷ്യൽമീഡിയയിൽ വീഡിയോ പ്രത്യക്ഷപ്പെട്ടത്. ശേഷം ദശലക്ഷകണക്കിന് ആളുകളാണ് വീഡിയോ കണ്ടത്.
സംഭവം പുന:പരിശോധിക്കുകയാണെന്ന് യുഎസ് ബോർഡർ ഉദ്യോഗസ്ഥർ പറഞ്ഞു. കൂടുതൽ വിവരങ്ങൾ നൽകാൻ ഇവർ വിസമ്മതിച്ചു. ജീവനക്കാരുടെ മോശം പെരുമാറ്റത്തെക്കുറിച്ചുള്ള എല്ലാ ആരോപണങ്ങളെയും ഗൗരവമായി കാണുന്നുവെന്നും കഴിയുന്നത്ര സുതാര്യത പുലർത്താൻ ശ്രമിക്കുന്നുണ്ടെന്നും ഏജൻസി അറിയിച്ചു.
