വ്യാപാര-സുരക്ഷാ ബന്ധം ശക്തിപ്പെടുത്തുന്നതിനുള്ള സമഗ്ര പങ്കാളിത്ത കരാറിൽ കാനഡയും മെക്സിക്കോയും ഒപ്പുവെച്ചു. രാജ്യാന്തര ക്രിമിനൽ സംഘങ്ങളെ നേരിടാനുള്ള സഹകരണവും ഇതിൽ ഉൾപ്പെടുത്തിയിട്ടുണ്ട്. മെക്സിക്കൻ മയക്കുമരുന്ന് മാഫിയകൾ കാനഡയിൽ പ്രവർത്തിക്കുന്നുണ്ടെന്നും അതോടൊപ്പം കാനഡയിലെ മാഫിയ സംഘങ്ങൾ , മെക്സിക്കോയിലും പ്രവർത്തിക്കുന്നുണ്ടെന്നും പ്രധാനമന്ത്രി മാർക് കാർണി വ്യക്തമാക്കി. മെക്സിക്കോ സിറ്റിയിൽ മെക്സിക്കൻ പ്രസിഡൻ്റ് ക്ലോഡിയ ഷെയിൻബൗമിനൊപ്പം സംസാരിക്കവെ ആയിരുന്നു കാർണിയുടെ പ്രതികരണം.
മാഫിയ സംഘങ്ങൾക്ക് എതിരെ ഉള്ള ഇരു രാജ്യങ്ങളുടെയും സഹകരണം കൂടുതൽ ആഴത്തിലാക്കുകയാണ് ലക്ഷ്യമെന്നും കാർണി പറഞ്ഞു. കനേഡിയൻ സംഘങ്ങൾ മെക്സിക്കോയിൽ പ്രവർത്തിക്കുന്നുണ്ടെന്ന് ഞാൻ സമ്മതിക്കുന്നു. ഇതുമായി ബന്ധപ്പെട്ട് മെക്സിക്കൻ അധികൃതരുമായി സഹകരിക്കുകയും വിവരങ്ങൾ പങ്കുവയ്ക്കുകയും ചെയ്യുന്നുണ്ട്. ആ സഹകരണം ഞങ്ങൾ കൂടുതൽ ആഴത്തിലാക്കുകയാണ്. ഈ കുറ്റവാളികളെ നിയമത്തിന് മുന്നിൽ കൊണ്ടുവരുന്നുവെന്ന് ഉറപ്പാക്കുന്നതിന് നിരീക്ഷണവും ഉയർന്ന പോലീസ് സഹകരണവും ആവശ്യമാണ്. കുറ്റവാളികൾ കാനഡയിലോ, മെക്സിക്കോയിലോ, അമേരിക്കയിലോ പ്രവർത്തിച്ചാലും അവരെ നിയമത്തിനു മുന്നിൽ കൊണ്ടുവരാനുള്ള പരിശ്രമത്തിൽ വിട്ടുവീഴ്ചയില്ലാതെ മുന്നോട്ടുപോകുമെന്നും കാർണി വ്യക്തമാക്കി.
