കാനഡയുമായി ഒരു വ്യാപാര കരാറിലെത്തുമെന്ന് പ്രതീക്ഷിക്കുന്നില്ലെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. കാനഡ ചര്‍ച്ചയ്ക്ക് പകരം താരിഫുകള്‍ക്ക് മാത്രമാണ് പ്രാധാന്യം നല്‍കുന്നതെന്നും അദ്ദേഹം കൂട്ടിച്ചേര്‍ത്തു. ഈ ആഴ്ച ആദ്യം കനേഡിയന്‍ പ്രധാനമന്ത്രി മാര്‍ക്ക് കാര്‍ണി ”മോശം കരാറിന്” കാനഡ തയ്യാറല്ലെന്നും ധൃതിപിടിച്ച് ഒരു കരാറില്‍ ഏര്‍പ്പെടില്ലെന്നും സൂചിപ്പിച്ചതിന് പിന്നാലെയാണ് ട്രംപിന്റെ ഈ പ്രസ്താവന.
ഓഗസ്റ്റ് 1-നകം കരാറില്‍ എത്തിയില്ലെങ്കില്‍ കാനഡയില്‍ നിന്നുള്ള സാധനങ്ങള്‍ക്ക് 35% നികുതി ചുമത്തുമെന്ന് ട്രംപ് മുന്നറിയിപ്പ് നല്‍കി. എന്നാല്‍ നിലവിലുള്ള വടക്കേ അമേരിക്കന്‍ സ്വതന്ത്ര വ്യാപാര കരാര്‍ പ്രകാരമുള്ള സാധനങ്ങള്‍ക്ക് ഇത് ബാധകമല്ല.
