ആറ് ജീവനക്കാരടക്കം 49 പേരുമായി പറന്ന റഷ്യന് യാത്രാ വിമാനം കിഴക്കന് അമുര് മേഖലയില് തകര്ന്നുവീണു. സൈബീരിയന് എയര്ലൈനായ അങ്കാരയുടെ വിമാനമാണ് അപകടത്തില്പ്പെട്ടത്. വിമാനത്തില് കുട്ടികളടക്കം ഏകദേശം 50 യാത്രക്കാരുണ്ടായിരുന്നതായും ആരും രക്ഷപ്പെടാന് സാധ്യതയില്ലെന്നും പ്രാദേശിക അധികൃതര് അറിയിച്ചു.
ചൈനയുമായി അതിര്ത്തി പങ്കിടുന്ന അമുര് മേഖലയിലെ ടിന്ഡ പട്ടണത്തിലേക്ക് അടുക്കുമ്പോഴാണ് വിമാനം റഡാര് സ്ക്രീനില് നിന്ന് അപ്രത്യക്ഷമായത്. വിമാനത്തില് അഞ്ച് കുട്ടികളും ആറ് ജീവനക്കാരും ഉള്പ്പെടെ 49 പേരുണ്ടായിരുന്നതായി റീജിയണല് ഗവര്ണര് വാസിലി ഓര്ലോവ് പറഞ്ഞു. റഷ്യയുടെ അടിയന്തര മന്ത്രാലയം നടത്തിയ തിരച്ചിലാണ് വിമാനത്തിന്റെ അവശിഷ്ടങ്ങള് കണ്ടെത്തിയത്.
മോശം കാലാവസ്ഥയും കാഴ്ചക്കുറവും കാരണം ലാന്ഡ് ചെയ്യുന്നതിനിടെ ജീവനക്കാര്ക്ക് സംഭവിച്ച പിഴവാണ് അപകടകാരണമെന്നാണ് പ്രാഥമിക റിപ്പോര്ട്ടുകള്. 1950-കളില് നിര്മ്മിച്ച അന്റോനോവ് ആന്-24 വിമാനമാണ് അപകടത്തില്പ്പെട്ടത്. ചരക്ക്, യാത്രാ ഗതാഗതങ്ങള്ക്കായി റഷ്യയില് ഈ വിമാനം വ്യാപകമായി ഉപയോഗിക്കുന്നുണ്ട്.
