മനുഷ്യാവകാശ ലംഘനം ആരോപിച്ച് ക്യൂബൻ പ്രസിഡന്റ് മിഗ്വൽ ഡയസ്-കാനലിന് വീസ വിലക്ക് ഏർപ്പെടുത്തി അമേരിക്ക. പ്രതിരോധ മന്ത്രി അൽവാരോ ലോപ്പസ് മിയേര, ആഭ്യന്തര മന്ത്രി ലസാരോ ആൽബെർട്ടോ അൽവാരസ് കാസസ് എന്നിവരെയും അമേരിക്ക കരിമ്പട്ടികയിൽ ഉൾപ്പെടുത്തിയിട്ടുണ്ട്. 2021-ൽ ഹവാനയിൽ നടന്ന സർക്കാർ വിരുദ്ധ പ്രതിഷേധങ്ങളും സംഘർഷങ്ങളും അടിച്ചമർത്തിയതുമായി ബന്ധപ്പെട്ടാണ് നടപടി. എല്ലാ രാഷ്ട്രീയ തടവുകാരെയും മോചിപ്പിക്കണമെന്ന് ഫ്ലോറിഡ സെനറ്റർ മാർക്കോ റൂബിയോ ഉൾപ്പെടെയുള്ള അമേരിക്കൻ നേതാക്കൾ ആവശ്യപ്പെട്ടിട്ടുണ്ട്.
അതേസമയം, സാമ്പത്തിക ബുദ്ധിമുട്ടുകൾ മുതലെടുത്ത് അമേരിക്കയാണ് 2021-ലെ കലാപത്തിന് പ്രേരിപ്പിച്ചതെന്ന് ക്യൂബ ആരോപിക്കുന്നു. അമേരിക്കയുടെ സാമ്രാജ്യത്വ നയങ്ങളെ ചെറുക്കുമെന്നും തങ്ങൾ പരമാധികാരികളും സ്വതന്ത്രരുമാണെന്നും ക്യൂബൻ വിദേശകാര്യ മന്ത്രാലയം പ്രഖ്യാപിച്ചു. ഹവാനയ്ക്കു മേലുള്ള അമേരിക്കൻ ഉപരോധങ്ങളെ റഷ്യയും ചൈനയും അപലപിച്ചിട്ടുണ്ട്.
