യുഎസില്‍ നിന്ന് ഡോക്ടര്‍മാരെയും നഴ്‌സുമാരെയും റിക്രൂട്ട് ചെയ്യുന്നതിനായി ആറ് ആഴ്ച നീണ്ടുനില്‍ക്കുന്ന കാമ്പെയ്ന്‍ ആരംഭിച്ച് ബ്രിട്ടിഷ് കൊളംബിയ സര്‍ക്കാര്‍. രാഷ്ട്രീയ അരക്ഷിതാവസ്ഥയും ആരോഗ്യ പരിപാലന രംഗത്തെ പിരിച്ചുവിടലുകളും കാരണം അസംതൃപ്തരായ യുഎസ് ഡോക്ടര്‍മാരെയും ആരോഗ്യ പ്രവര്‍ത്തകരെയും പ്രവിശ്യയിലേക്ക് ആകര്‍ഷിക്കാനുളള പദ്ധതിയുടെ ഭാഗമായാണ് ഈ നീക്കം. ഇതിനായി 50 ലക്ഷം ഡോളര്‍ വിനിയോഗിക്കുമെന്ന് ബ്രിട്ടിഷ് കൊളംബിയ സര്‍ക്കാര്‍ അറിയിച്ചു.

തിങ്കളാഴ്ച ആരംഭിച്ച കാമ്പെയ്ന്‍ വാഷിങ്ടണ്‍ , ഒറിഗണ്‍, കാലിഫോര്‍ണിയ എന്നിവിടങ്ങളിലെ ആയിരക്കണക്കിന് പരസ്യ സ്‌ക്രീനുകളിലും, ആശുപത്രികളുടെ 16 കിലോമീറ്റര്‍ ചുറ്റളവിലും, പോഡ്കാസ്റ്റുകളിലും നെറ്റ്ഫ്‌ലിക്‌സ് ഷോകളിലും പ്രദര്‍ശിപ്പിക്കുന്നതായി ബ്രിട്ടിഷ് കൊളംബിയ ആരോഗ്യ മന്ത്രാലയം അറിയിച്ചു. ഡോക്ടര്‍മാരെയും നഴ്സുമാരെയും മറ്റ് ആരോഗ്യ പ്രവര്‍ത്തകരെയും ആകര്‍ഷിക്കുന്നതിനും അവര്‍ക്ക് എളുപ്പത്തില്‍ സ്ഥലംമാറ്റം സാധ്യമാക്കുന്നതിനുമായാണ് പ്രവിശ്യ ഈ നടപടി സ്വീകരിക്കേണ്ടതുണ്ടെന്ന് ബ്രിട്ടിഷ് കൊളംബിയ ആരോഗ്യ മന്ത്രി ജോസി ഓസ്ബോണ്‍ പറയുന്നു. കാമ്പെയ്ന്‍ ആരംഭിക്കുന്നതിന് മുമ്പുതന്നെ 700 ഡോക്ടര്‍മാരും 500 നഴ്സുമാരും ഉള്‍പ്പെടെ ഏകദേശം 1,600 ആരോഗ്യ പ്രവര്‍ത്തകര്‍ ബ്രിട്ടിഷ് കൊളംബിയയിലേക്ക് മാറാന്‍ താല്‍പര്യം പ്രകടിപ്പിച്ചിരുന്നതായി ജോസി ഓസ്ബോണ്‍ അറിയിച്ചു.

പ്രവിശ്യയിലുടനീളമുള്ള ആരോഗ്യപ്രവര്‍ത്തകരുടെ ക്ഷാമം പരിഹരിക്കുക എന്ന ലക്ഷ്യത്തോടെയാണ് റിക്രൂട്ട്മെന്റ് കാമ്പെയ്ന്‍ ആരംഭിക്കുന്നതെന്ന് പ്രീമിയര്‍ ഡേവിഡ് എബിയും ജോസി ഓസ്ബോണും നേരത്തെ പറഞ്ഞിരുന്നു.