വടക്കുകിഴക്കൻ കാൽഗറിയിൽ വാഹനാപകടത്തെ തുടർന്നുണ്ടായ തീപിടിത്തത്തിൽ മൂന്ന് പേർ മരിക്കുകയും 19 പേർക്ക് പരുക്കേൽക്കുകയും ചെയ്തു. വ്യാഴാഴ്ച ഉച്ചയ്ക്ക് ഒരു മണിയോടെ സാഡിൽടൗൺ സർക്കിളിലെ 800-ാം ബ്ലോക്കിലാണ് സംഭവം. അപകടത്തിൽ രണ്ടു രണ്ട് സിറ്റി ബസുകളും മറ്റ് ആറ് വാഹനങ്ങളും ഉൾപ്പെട്ടിട്ടുണ്ടെന്ന് കാൽഗറി പൊലീസ് അറിയിച്ചു. പരുക്കേറ്റവരിൽ ഒരാളുടെ നില ഗുരുതരമാണ്. സംഭവസ്ഥലത്തുണ്ടായിരുന്ന കാൽഗറി പൊലീസ് സർവീസിലെ ഒരു ഉദ്യോഗസ്ഥനും നിസ്സാര പരുക്കേറ്റിട്ടുണ്ട്. പരുക്കേറ്റ 10 പേരെ വിവിധ ആശുപത്രികളിലേക്ക് മാറ്റിയിട്ടുണ്ട്.
സാഡിൽടൗൺ സർക്കിൾ എൻ.ഇ.-യിൽ (Saddletowne Circle N.E.) വടക്കോട്ട് സഞ്ചരിക്കുകയായിരുന്ന ഒരു ബസ്, വെള്ള നിറത്തിലുള്ള മറ്റൊരു വാഹനവുമായി കൂട്ടിയിടിക്കുകയും, ആ വാഹനം പിന്നീട് കറുത്ത നിറത്തിലുള്ള മറ്റൊരു വാഹനത്തിൽ ഇടിക്കുകയുമായിരുന്നു. വെള്ള നിറത്തിലുള്ള വാഹനം തുടർന്ന് ഒരു ക്യൂബ് വാനിലും, അതിനുശേഷം രണ്ടാമതൊരു ബസിലും ഇടിച്ചതായി കാൽഗറി പൊലീസ് സർജന്റ് ആൻഡി വുഡ്‌വാർഡ് അറിയിച്ചു.
