ഓട്ടവ: ഇ-സ്‌കൂട്ടറുകളും ഇ-ബൈക്കുകളും ഉപയോഗിക്കുന്ന കുട്ടികൾക്കിടയിൽ ഗുരുതരമായ പരുക്കുകളും മരണങ്ങളും വർദ്ധിക്കുന്ന സാഹചര്യത്തിൽ, ഇത്തരം അപകടങ്ങളെക്കുറിച്ച് കൃത്യമായ വിവര ശേഖരണവും നിരീക്ഷണവും വേണമെന്ന് ശിശുരോഗ വിദഗ്ദ്ധർ ആവശ്യപ്പെടുന്നു.

കനേഡിയൻ പീഡിയാട്രിക് സർവെയ്‌ലൻസ് പ്രോഗ്രാം (CPSP) തയാറാക്കിയ പുതിയ റിപ്പോർട്ടിലാണ് ആശങ്കാജനകമായ കണക്കുകൾ പുറത്തുവന്നത്. 2025-ൽ ശിശുരോഗ വിദഗ്ദ്ധരിൽ നിന്ന് ശേഖരിച്ച വിവരങ്ങൾ അനുസരിച്ച് 48 ഗുരുതര പരുക്കുകളോ മരണങ്ങളോ റിപ്പോർട്ട് ചെയ്തിട്ടുണ്ട്. ഇതിൽ 26 പേർ രണ്ടു ദിവസത്തിൽ കൂടുതൽ ആശുപത്രിയിൽ ചികിത്സയിൽ കഴിഞ്ഞപ്പോൾ 12 പേർ തീവ്രപരിചരണ വിഭാഗത്തിൽ (ICU) പ്രവേശിക്കപ്പെട്ടു. വർഗ്ഗീകരിക്കാൻ കഴിയാത്ത ഒൻപത് കേസുകളും ഉണ്ടായിരുന്നു.

എന്നാൽ, വ്യക്തിഗത ഇലക്ട്രിക് വാഹന അപകടങ്ങളിൽ (PPMD) 10 കുട്ടികൾ മരണപ്പെട്ടതായി പ്രമുഖ ഡോക്ടറായ ഡാനിയൽ റോസൻഫീൽഡ് വെളിപ്പെടുത്തി. മാധ്യമങ്ങളിൽ നിന്നോ പോലീസിൽ നിന്നോ അല്ലാതെ, ഇത്തരമൊരു റിപ്പോർട്ടിലൂടെ കുട്ടികളുടെ മരണസംഖ്യ പുറത്തുവരുന്നത് ഇതാദ്യമായാണ്.

ഇത്തരം വാഹനങ്ങൾ ആളുകൾ സാധാരണയായി മരണകാരണമായി കാണാറില്ലെന്ന് ഡോ. റോസൻഫീൽഡ് പറഞ്ഞു. “ചെറിയ പരുക്കുകളോടെ എത്തുന്ന കുട്ടികളുടെ എണ്ണത്തിൽ നിന്ന് തന്നെ ഇവയുടെ ഉപയോഗം വർദ്ധിക്കുന്നതായി വ്യക്തമാണ്. അതോടൊപ്പം തന്നെ മരണസംഖ്യയും ഉയരുകയാണ്,” അദ്ദേഹം വ്യക്തമാക്കി. ഇ-സ്‌കൂട്ടറുകളാണ് ഇത്തരം അപകടങ്ങളിൽ ഏറ്റവും കൂടുതൽ ഉൾപ്പെട്ടിട്ടുള്ളതെന്നും റിപ്പോർട്ടിൽ പറയുന്നു.

കനേഡിയൻ ഇൻസ്റ്റിറ്റ്യൂട്ട് ഫോർ ഹെൽത്ത് ഇൻഫർമേഷൻ പുറത്തുവിട്ട വിവരങ്ങൾ പ്രകാരം, 2023-നും 2024-നും ഇടയിൽ 5 മുതൽ 17 വയസ്സുവരെയുള്ള 53 കുട്ടികൾ പരുക്കേറ്റ് ആശുപത്രിയിൽ ചികിത്സ തേടിയിരുന്നു. പരുക്കേറ്റവരിൽ 47 ശതമാനം പേർക്ക് തലയ്ക്കും 40 ശതമാനം പേർക്ക് കൈകാലുകൾക്കുമാണ് പരുക്കേറ്റത്. തലയ്ക്കേൽക്കുന്ന ഗുരുതര പരുക്കുകൾ ജീവിതകാലം മുഴുവൻ നീണ്ടുനിൽക്കുന്ന വൈകല്യങ്ങൾക്ക് കാരണമായേക്കാമെന്ന് ഡോക്ടർമാർ മുന്നറിയിപ്പ് നൽകുന്നു.

റിപ്പോർട്ട് ചെയ്ത കേസുകളിൽ 42 ശതമാനവും 10 നും 15 നും ഇടയിൽ പ്രായമുള്ള കുട്ടികളാണ്. 18 ശതമാനം 5 നും 9 നും ഇടയിൽ പ്രായമുള്ളവരാണ്. അപകടത്തിൽപ്പെടുന്ന കുട്ടികളുടെ ശരാശരി പ്രായം 10 നും 12 നും ഇടയിലാണ്.

വ്യത്യസ്തമായ നിയമങ്ങളും സുരക്ഷാ മാനദണ്ഡങ്ങളും

ഇ-ബൈക്കുകളും ഇ-സ്‌കൂട്ടറുകളും ഓടിക്കുന്നതിനായുള്ള നിയമങ്ങൾ കാനഡയിലെ ഓരോ പ്രവിശ്യയിലും വ്യത്യസ്തമാണ്. ഒന്റാറിയോ, പ്രിൻസ് എഡ്വേർഡ് ഐലൻഡ് (PEI), ബ്രിട്ടീഷ് കൊളംബിയ (BC): ഇ-ബൈക്കുകൾ ഓടിക്കാൻ കുറഞ്ഞത് 16 വയസ്സ് തികഞ്ഞിരിക്കണം. എന്നാൽ മറ്റ് ചില പ്രവിശ്യകളിൽ ഇത് 14 അല്ലെങ്കിൽ 15 വയസ്സാണ്. ചിലയിടങ്ങളിൽ പ്രായപരിധിയില്ല. ക്യുബെക്ക്: പ്രായപരിധി 18 ആണെങ്കിലും, ലൈസൻസുള്ളവർക്ക് 14 വയസ്സു മുതൽ ഓടിക്കാം. ഇ-സ്‌കൂട്ടറുകൾ: ഒന്റാറിയോ, ബി.സി തുടങ്ങിയ സ്ഥലങ്ങളിൽ പ്രായപരിധി 16 ആണ്. ക്യുബെക്ക്, നോവ സ്കോട്ടിയ എന്നിവിടങ്ങളിൽ ഇത് 14 ആണ്. ആൽബർട്ട, സസ്കാച്ചെവൻ: പൊതുനിരത്തുകളിൽ ഇ-സ്‌കൂട്ടറുകൾക്ക് നിരോധനമുണ്ടെങ്കിലും തദ്ദേശ സ്ഥാപനങ്ങൾ വഴി നഗരങ്ങളിൽ ഉപയോഗിക്കാൻ അനുമതിയുണ്ട്.

രാജ്യവ്യാപകമായി നിയമങ്ങൾ ഏകീകരിക്കുന്നത് ഗുണം ചെയ്യുമെന്ന് റോസൻഫീൽഡ് പറഞ്ഞു. അതോടൊപ്പം സുരക്ഷാ വിദ്യാഭ്യാസം, നിയമങ്ങൾ കർശനമായി നടപ്പിലാക്കൽ, കൂടുതൽ സുരക്ഷിതമായ വാഹനങ്ങൾ രൂപകൽപ്പന ചെയ്യൽ എന്നിവയിലാണ് ഇപ്പോൾ ശ്രദ്ധ കേന്ദ്രീകരിക്കേണ്ടതെന്നും അദ്ദേഹം കൂട്ടിച്ചേർത്തു.