ടോക്യോ: ആഗോള മത്സരക്ഷമത വീണ്ടെടുക്കുന്നതിനായി ഇരു ബ്രാൻഡുകളും സംയോജിപ്പിച്ച് മുന്നേറുന്നതിനായി ഹോണ്ട മോട്ടോർ കമ്പനിയുമായി ചേർന്ന് ഒപ്പുവെച്ച കരാറിൽനിന്ന് നിസ്സാൻ മോട്ടോർ കമ്പനി പിന്മാറിയതായി ബുധനാഴ്ച അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ടൈ-അപ്പിന്റെ നിബന്ധനകൾ ഇരുകമ്പനികളും ചർച്ച ചെയ്തുവരികയായിരുന്നു. പരസ്പരം മത്സരിച്ചിരുന്ന ഹോണ്ടയും നിസ്സാനും കരാർ പ്രകാരം ഒന്നായി ചേർന്നുകൊണ്ട് വിപണിയെ നേരിടാനും 2026ൽ രണ്ട് ബ്രാൻഡുകളെയും ഒരൊറ്റ ഹോൾഡിംഗ് കമ്പനിയുടെ കീഴിൽ കൊണ്ടുവരുകയും ചെയ്യുമായിരുന്നു.
എന്നാൽ ഏഴ് ആഴ്ചയോളം ചർച്ചകൾ നടത്തിയിട്ടും പ്രധാനപ്പെട്ട പലകാര്യങ്ങളിലും യോജിപ്പിലോ സമവായത്തിലോ എത്താൽ രണ്ടുകമ്പനികൾക്കും കഴിഞ്ഞില്ല. അതോടെ ജപ്പാനിലെ വാഹന വ്യവസായത്തിൽ പുതുചരിത്രമാകുമായിരുന്ന പങ്കാളിത്ത ശ്രമങ്ങൾക്ക് അവസാനമായി. കരാർ പരാജയപ്പെട്ട റിപ്പോർട്ടിന്റെ അടിസ്ഥാനത്തിൽ ടോക്കിയോ സ്റ്റോക്ക് എക്സ്ചേഞ്ച് നിസാന്റെ ഓഹരികളുടെ വ്യാപാരം നിർത്തിവച്ചു. ഹോണ്ടയുടെ ഓഹരികൾ 12% വരെ ഉയർന്നപ്പോൾ നിസ്സാൻ 6.4% വരെ ഇടിഞ്ഞു.
