ഇറ്റലിയിൽ നടക്കുന്ന 2026 വിൻ്റർ ഒളിംപിക്സ് മത്സരങ്ങൾ തത്സമയം കാണുന്ന ആരാധകർക്കായി ടൊറൻ്റോയിലെ മദ്യശാലകളുടെ പ്രവർത്തന സമയത്തിൽ ഇളവ് വരുത്താൻ സിറ്റി കൗൺസിൽ തീരുമാനം. സാധാരണ സമയത്തേക്കാൾ നേരത്തെ, അതായത് പുലർച്ചെ 6 മണി മുതൽ മദ്യം വിളമ്പാൻ അനുമതി നൽകണമെന്ന പ്രമേയം മേയർ ഒലീവിയ ചൗ ബുധനാഴ്ച കൗൺസിലിൽ അവതരിപ്പിച്ചു. ഫെബ്രുവരി 5 മുതൽ ഫെബ്രുവരി 22 വരെയുള്ള കാലയളവിൽ നഗരത്തിലെ കഫേകൾക്കും റെസ്റ്റോറൻ്റുകൾക്കും പുലർച്ചെ 6 മണിക്ക് തന്നെ മദ്യം വിളമ്പിത്തുടങ്ങാം.
ടൊറൻ്റോയും ഇറ്റലിയും തമ്മിലുള്ള സമയവ്യത്യാസം കാരണം പല പ്രധാന ഒളിംപിക്സ് മത്സരങ്ങളും കാനഡയിൽ പുലർച്ചെ 6 മണി മുതലാണ് തുടങ്ങുന്നത്. ഈ സമയത്ത് മത്സരങ്ങൾ കാണാൻ എത്തുന്നവർക്ക് സൗകര്യമൊരുക്കാനാണ് ഈ നീക്കം. പ്രാദേശിക വ്യാപാര-വ്യവസായ സ്ഥാപനങ്ങളെ സഹായിക്കുന്നതിനും ഒളിംപിക്സ് ആഘോഷങ്ങൾ കൂടുതൽ ആവേശത്തിലാക്കുന്നതിനും വേണ്ടിയാണ് ഈ തീരുമാനമെന്ന് മേയർ ഒലീവിയ ചൗ വ്യക്തമാക്കി. ഇതാദ്യമായല്ല പ്രത്യേക സാഹചര്യങ്ങളിൽ മദ്യവിതരണ സമയപരിധി നീട്ടി നൽകുന്നത്. 2023-ൽ നടന്ന ഫിഫ വനിതാ ലോകകപ്പ് സമയത്ത് പുലർച്ചെ 7 മണി മുതൽ മദ്യം വിളമ്പാൻ അനുമതി നൽകിയിരുന്നു.
