ജനസംഖ്യ വർധനയ്ക്കൊപ്പം കാലാവസ്ഥ വ്യതിയാനവും കാരണം, പരിഷ്കരിച്ച ജലസംരക്ഷണ പദ്ധതിയിൽ പൊതുജനങ്ങളുടെ അഭിപ്രായം തേടി കാൽഗറി സിറ്റി. 2026-ഓടെ ജലത്തിൻ്റെ ഉപയോഗം കൂടുതൽ കാര്യക്ഷമമാക്കാനുള്ള മാർഗ്ഗരേഖയാണ് ജലക്ഷമതാ പദ്ധതി (Water Efficiency Plan). അടുത്ത 10 വർഷത്തിനുള്ളിൽ നഗരത്തിലെ ജനസംഖ്യ 20 ലക്ഷത്തിലെത്തുമെന്നാണ് സിറ്റിയുടെ കണക്കുകൂട്ടൽ. വർധിക്കുന്ന താപനിലയും മഴയിലെ മാറ്റങ്ങളും കാരണം ജലസംരക്ഷണം നിർണായകമാണെന്ന് സിറ്റി ഓഫ് കാൽഗറി അധികൃതർ വ്യക്തമാക്കി.
2024-ൽ ഉണ്ടായ പ്രധാന പൈപ്പ് പൊട്ടൽ പോലുള്ള അടിയന്തര ഘട്ടങ്ങൾ മുന്നിൽക്കണ്ടാണ് പദ്ധതിക്ക് രൂപം നൽകുന്നത്. 2023-ൽ അംഗീകരിച്ച വരൾച്ചാ പ്രതിരോധ പദ്ധതിയുടെ തുടർച്ചയാണിത്. മുമ്പ്, “30-ഇൻ-30” പദ്ധതിയിലൂടെ ആളോഹരി ജലഉപയോഗം ഗണ്യമായി കുറയ്ക്കാൻ കാൽഗറിയ്ക്ക് സാധിച്ചിരുന്നു. പൊതുജനങ്ങളുടെ അനുഭവങ്ങളും ആശയങ്ങളും 2026-ലെ ഈ പദ്ധതിയുടെ രൂപരേഖയെ സ്വാധീനിക്കും. ഡിസംബർ 7 വരെ പൗരന്മാർക്ക് engage.calgary.ca/waterefficiency എന്ന വെബ്സൈറ്റ് വഴി തങ്ങളുടെ അഭിപ്രായങ്ങൾ രേഖപ്പെടുത്താം.
