തായ്വാൻ കടലിടുക്കിന് സമീപമുള്ള തന്ത്രപ്രധാനമായ ആകാശപാതകൾ 40 ദിവസത്തേക്ക് അടച്ചിടുമെന്ന് ചൈനീസ് സർക്കാർ. മാർച്ച് 27 മുതൽ മെയ് 6 വരെ നീണ്ടുനിൽക്കുന്ന ഈ നിയന്ത്രണം മേഖലയിൽ പുതിയൊരു ‘ഏവിയേഷൻ മിസ്റ്ററി’ക്ക് വഴി വെച്ചിരിക്കുകയാണ്. സാധാരണയായി ചുരുങ്ങിയ ദിവസത്തേക്ക് മാത്രം നൽകാറുള്ള NOTAM (Notice to Air Missions) ഇത്തവണ 40 ദിവസത്തേക്കാണ് ചൈന പ്രഖ്യാപിച്ചിരിക്കുന്നത്. തായ്വാൻ ദ്വീപിനേക്കാൾ വലിയ പ്രദേശം ഇതിന്റെ പരിധിയിൽ വരുന്നു. ഷാങ്ഹായിക്ക് വടക്കും തെക്കും ഉള്ള കിഴക്കൻ ചൈനാ കടൽ മുതൽ മഞ്ഞക്കടൽ വരെയുള്ള ഭാഗങ്ങളിലാണ് നിയന്ത്രണം. നിയന്ത്രണം നിലവിൽ വന്നതോടെ തായ്വാന് ചുറ്റും ചൈന നടത്തിവരാറുള്ള പതിവ് സൈനിക വിമാന പ്രവാഹങ്ങൾ പെട്ടെന്ന് നിലച്ചതും നിരീക്ഷകർ സംശയത്തോടെയാണ് കാണുന്നത്.
ഔദ്യോഗികമായി ഒരു വിശദീകരണവും ചൈന നൽകിയിട്ടില്ലെങ്കിലും, അമേരിക്ക പശ്ചിമേഷ്യൻ സംഘർഷങ്ങളിൽ ശ്രദ്ധ കേന്ദ്രീകരിച്ചിരിക്കുന്ന സമയം മുതലെടുത്ത് ഇന്തോ-പസഫിക് മേഖലയിൽ തങ്ങളുടെ സ്വാധീനം ഉറപ്പിക്കാനാണ് ബീജിങ് ശ്രമിക്കുന്നതെന്നാണ് തായ്വാൻ്റെ ആരോപണം. പെട്ടെന്നുള്ള ഒരു യുദ്ധസാഹചര്യത്തിൽ ആകാശപാതകൾ പൂർണ്ണമായി നിയന്ത്രിക്കാനും അമേരിക്കൻ വിമാനങ്ങളെ തടയാനുമുള്ള ശേഷി ചൈന പരീക്ഷിക്കുകയാണെന്ന് യുഎസ് നേവൽ വാർ കോളേജിലെ വിദഗ്ധർ കരുതുന്നു.
പശ്ചിമേഷ്യയിലെ (ഇറാൻ ഉൾപ്പെടെയുള്ള) സംഘർഷങ്ങളിൽ അമേരിക്ക ശ്രദ്ധ കേന്ദ്രീകരിച്ചിരിക്കുന്ന സമയം മുതലെടുത്ത് ഏഷ്യൻ മേഖലയിൽ തങ്ങളുടെ സൈനികാധിപത്യം ഉറപ്പിക്കാനാണ് ബീജിങിൻ്റെ ശ്രമം എന്നും വിലയിരുത്തലുണ്ട്. ജപ്പാൻ, ദക്ഷിണ കൊറിയ എന്നീ രാജ്യങ്ങൾക്ക് സമീപമുള്ള പാതകൾ തടസ്സപ്പെടുത്തുന്നതിലൂടെ മേഖലയിലെ അമേരിക്കൻ സ്വാധീനം കുറയ്ക്കുക എന്നതും ചൈനയുടെ മറ്റൊരു ലക്ഷ്യമാണ്. സിവിൽ വിമാനങ്ങളെ നേരിട്ട് നിരോധിച്ചിട്ടില്ലെങ്കിലും, ഈ മേഖലയിലൂടെ കടന്നുപോകുന്ന വിമാനങ്ങൾ ചൈനീസ് അധികൃതരുമായി കൃത്യമായ ഏകോപനം നടത്തേണ്ടതുണ്ട്. ഇത് അന്താരാഷ്ട്ര വിമാന സർവീസുകളെയും ചരക്ക് നീക്കത്തെയും ബാധിക്കാൻ സാധ്യതയുണ്ട്. ചൈനയുടെ ഈ നീക്കം വരും ദിവസങ്ങളിൽ ഏഷ്യൻ മേഖലയിൽ വലിയ നയതന്ത്ര സമ്മർദ്ദങ്ങൾക്കും സൈനിക നീക്കങ്ങൾക്കും കാരണമായേക്കും. തുടർച്ചയായ 40 ദിവസത്തെ ഈ നിശബ്ദമായ നീക്കം ഒരു വലിയ സൈനിക നീക്കത്തിന്റെ മുന്നോടിയാണോ എന്നാണ് ലോകം ഉറ്റുനോക്കുന്നത്.
