ഇറാന്‍ ആണവപദ്ധതിയുമായി മുന്നോട്ട് പോവുകയാണെങ്കില്‍ വീണ്ടും സൈനിക നടപടി സ്വീകരിക്കുമെന്ന് യുഎസ് പ്രസിഡന്റ് ഡോണള്‍ഡ് ട്രംപ് മുന്നറിയിപ്പ് നല്‍കി. ഇറാനുമേല്‍ ഏര്‍പ്പെടുത്തിയിട്ടുള്ള ഉപരോധങ്ങളില്‍ ഇളവ് നല്‍കുന്ന കാര്യത്തില്‍ ഇനി യാതൊരു ചര്‍ച്ചയുമില്ലെന്നും അദ്ദേഹം പ്രഖ്യാപിച്ചു.
ഖമനയി ഇപ്പോഴും ജീവനോടെയിരിക്കുന്നതിനു കാരണം താനാണെന്ന് ട്രംപ് അവകാശപ്പെട്ടു. ‘ഖമനയിയുടെ ഒളിവിടം എനിക്ക് അറിയാമായിരുന്നു. അദ്ദേഹത്തെ വധിക്കുന്നതില്‍നിന്ന് ഇസ്രയേലിനെയും യുഎസ് സേനകളെയും തടഞ്ഞതു ഞാനാണ്. പരമദയനീയമായൊരു അന്ത്യത്തില്‍നിന്നാണ് ഞാന്‍ അദ്ദേഹത്തെ രക്ഷിച്ചത്’- ട്രംപ് സമൂഹമാധ്യമത്തില്‍ പറഞ്ഞു.
ആണവകേന്ദ്രങ്ങളിലെ യുഎസ് ആക്രമണം കാര്യമായി ഏശിയില്ലെന്നും ഖത്തറിലെ സേനാതാവളങ്ങളില്‍ നടത്തിയ ആക്രമണം യുഎസിന്റെ മുഖത്തടിക്കും പോലെയായിരുന്നെന്നും ഇറാന്‍ പരമോന്നത നേതാവ് ആയത്തുല്ല അലി ഖമനയി പറഞ്ഞതാണ് ട്രംപിനെ ചൊടിപ്പിച്ചത്. ഇറാനുമായി ആണവ കരാര്‍ ആഗ്രഹിക്കുന്നെങ്കില്‍ ഖമനയിയെക്കുറിച്ച് ട്രംപ് അല്‍പം കൂടി ബഹുമാനത്തോടെ സംസാരിക്കണമെന്ന് ഇറാന്‍ വിദേശകാര്യമന്ത്രി അബ്ബാസ് അറഗ്ചി പ്രതികരിച്ചു.
