യുഎസ് പ്രസിഡൻ്റ് ഡൊണാൾഡ് ട്രംപ് പുതുതായി രൂപീകരിച്ച ‘ബോർഡ് ഓഫ് പീസ്’ സമിതിയിലേക്കുള്ള കനേഡിയൻ പ്രധാനമന്ത്രി മാർക്ക് കാർണിക്കുള്ള ക്ഷണം റദ്ദാക്കി. സ്വിറ്റ്സർലൻഡിലെ ദാവോസിൽ നടന്ന ലോക സാമ്പത്തിക ഫോറത്തിൽ ആഗോള സാമ്പത്തിക ക്രമത്തെക്കുറിച്ച് കാർണി നടത്തിയ പ്രസംഗമാണ് ട്രംപിനെ ചൊടിപ്പിച്ചത്. വൻശക്തിയായ രാജ്യങ്ങളുടെ സാമ്പത്തിക സമ്മർദ്ദങ്ങൾക്കെതിരെ ചെറുരാജ്യങ്ങൾ ഐക്യപ്പെടണമെന്ന കാർണിയുടെ ആഹ്വാനത്തെ നന്ദിയില്ലാത്ത നടപടിയെന്നാണ് ട്രംപ് വിശേഷിപ്പിച്ചത്.
ലോകചരിത്രത്തിലെ തന്നെ ഏറ്റവും ഉന്നതമായ നേതൃത്വ സമിതിയാണ് ബോർഡ് ഓഫ് പീസ് എന്ന് അവകാശപ്പെട്ട ട്രംപ്, വ്യക്തമായ കാരണങ്ങൾ വെളിപ്പെടുത്താതെയാണ് സമൂഹമാധ്യമങ്ങളിലൂടെ തീരുമാനം അറിയിച്ചത്. സമിതിയുടെ പ്രവർത്തനരീതിയെക്കുറിച്ച് നേരത്തെ തന്നെ ആശങ്ക പ്രകടിപ്പിച്ചിരുന്ന കാർണി, യുഎസ് പ്രസിഡണ്ടിൻ്റെ തീരുമാനത്തോട് പക്വമായ പ്രതികരണമാണ് നടത്തിയത്. പഴയ ആഗോള വ്യവസ്ഥിതികൾക്ക് മാറ്റം വന്നതായും സഖ്യകക്ഷികൾ തമ്മിലുള്ള പരസ്പര ബഹുമാനം അനിവാര്യമാണെന്നും അദ്ദേഹം ആവർത്തിച്ചു.
യുഎസ് പ്രതിനിധീകരിക്കുന്ന സാമ്പത്തിക മേധാവിത്വത്തോടുള്ള കാനഡയുടെ വിയോജിപ്പാണ് ഈ നയതന്ത്ര വിള്ളലിന് ആധാരം. കാനഡയും പ്രമുഖ യൂറോപ്യൻ രാജ്യങ്ങളും വിട്ടുനിന്ന ചടങ്ങിലാണ് സമിതിയുടെ പ്രഖ്യാപനം നടന്നത് എന്നത് ശ്രദ്ധേയമാണ്. ഈ നടപടി ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തിൽ പുതിയ പ്രതിസന്ധികൾക്ക് വഴിവെച്ചേക്കാം.
