കാനഡ ഫെഡറൽ തിരഞ്ഞെടുപ്പിൽ വിജയിച്ച പ്രധാനമന്ത്രി മാർക്ക് കാർണിക്ക് അഭിനന്ദനമറിയിച്ച്‌ യുഎസ് പ്രസിഡന്റ് ഡോണൾഡ് ട്രംപ്. ചൊവ്വാഴ്ച പ്രധാനമന്ത്രിയെ അഭിനന്ദിച്ചതായും ഉടൻ തന്നെ നേരിട്ട് കാണാൻ സമ്മതിച്ചതായും മാർക്ക് കാർണിയുടെ ഓഫീസ് അറിയിച്ചു.
ഇരുരാജ്യങ്ങളുടെയും പുരോഗതിക്കായി സ്വതന്ത്ര, പരമാധികാര രാഷ്ട്രങ്ങൾ എന്ന നിലയിൽ കാനഡയും അമേരിക്കയും ഒരുമിച്ച് പ്രവർത്തിക്കാൻ ഇരുനേതാക്കൾ സമ്മതിച്ചതായും, അതിനായി സമീപഭാവിയിൽ നേരിട്ട് കാണാൻ തീരുമാനിക്കുകയും ചെയ്‌തതായി പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ പറയുന്നു. എന്നാൽ ഫോൺ കോളിന്റെ വിശദാംശങ്ങൾ ട്രംപോ വൈറ്റ് ഹൗസോ ഇതുവരെ സ്ഥിരീകരിച്ചിട്ടില്ല.
അതേസമയം തിരഞ്ഞെടുപ്പ് ദിനവും കാനഡ അമേരിക്കൻ ഐക്യനാടുകളുടെ 51-ാമത് സംസ്ഥാനമായാൽ കാനഡയുടെ പ്രശ്‌നങ്ങൾക്കെല്ലാം പരിഹാരമാകുമെന്ന് ട്രംപ് ആവർത്തിച്ചിരുന്നു.
