ടൊറന്റോ: 911 എന്ന എമർജൻസി നമ്പറിലേക്ക് വരുന്ന അടിയന്തരമല്ലാത്ത കോളുകൾ വഴിതിരിച്ചുവിടാനുള്ള ശ്രമത്തിന്റെ ഭാഗമായി ടൊറന്റോ പോലീസ് പുതിയ മൂന്നക്ക നമ്പർ പുറത്തിറക്കി. 877 എന്നതാണ് പുതിയ നോൺ എമർജൻസി നമ്പർ. വീട്ടിൽ ആരുമില്ലാത്ത സമയത്തുണ്ടാകുന്ന അതിക്രമങ്ങൾ, അപകടകരമായ ഡ്രൈവിംഗ്, ആക്രമണ സ്വഭാവമില്ലാത്ത ഭീഷണികൾ എന്നിവ പോലുള്ള അടിയന്തര സാഹചര്യമല്ലാത്ത കുറ്റകൃത്യങ്ങൾ റിപ്പോർട്ട് ചെയ്യാൻ 877 നോൺ-എമർജൻസി നമ്പറിൽ വിളിക്കാം.
റോജേഴ്‌സ്, ബെൽ, ടെലസ് എന്നീ കമ്പനികളും അവയുടെ അനുബന്ധ കമ്പനികളും ഉൾപ്പെടെ എല്ലാ പ്രധാന വയർലെസ് കാരിയറുകളും നിലവിൽ ഈ നമ്പറിനെ പിന്തുണയ്ക്കുന്നുണ്ട്. എന്നാൽ പഴയ ഫോൺ ഇൻഫ്രാസ്ട്രക്ചർ വഴിയോ ലാൻഡ്‌ലൈനുകൾ വഴിയോ 877 ആക്‌സസ് ചെയ്യാൻ കഴിയില്ല. ഇത്തരം ഫോണുകൾ ഉപയോഗിക്കുന്നവർ 416-808-2222 എന്ന നമ്പറിൽ വിളിക്കുന്നത് തുടരണമെന്നും ടൊറന്റോ പോലീസ് അറിയിച്ചു.
