ആരാധനാലയങ്ങള്‍, സ്‌കൂളുകള്‍, ഡേകെയറുകള്‍ എന്നിവയ്ക്ക് സമീപം പ്രതിഷേധ പ്രകടനങ്ങള്‍ നിരോധിക്കുന്ന നിയമഭേദഗതിക്ക് അംഗീകരിച്ച് ടൊറന്റോ സിറ്റി കൗണ്‍സില്‍. ജൂലൈ രണ്ടു മുതല്‍ പ്രാബല്യത്തില്‍ വരുന്ന വിവാദ ‘ബബിള്‍ സോണ്‍’ നിയമഭേദഗതിയെ അനുകൂലിച്ച് കൗണ്‍സിലര്‍മാര്‍ വോട്ടു ചെയ്തു. 16 കൗണ്‍സിലര്‍മാര്‍ നിയമഭേദഗതിയെ അനുകൂലിച്ചപ്പോള്‍ ഒമ്പത് പേര്‍ എതിര്‍ത്തു വോട്ട് ചെയ്തു.

നിയമഭേദഗതി പ്രകാരം നിരോധിത മേഖല 20 മീറ്ററില്‍ നിന്നും 50 മീറ്ററായി ഉയര്‍ത്തിയിട്ടുണ്ട്. കൂടാതെ ‘ബബിള്‍ സോണ്‍’ ആവശ്യപ്പെടുന്ന പള്ളി, സിനഗോഗ്, മോസ്‌ക്, ഡേകെയറിനും അത് ലഭിക്കും. നഗരത്തിലുടനീളമുള്ള 3,000 സ്ഥലങ്ങളില്‍ ‘ബബിള്‍ സോണ്‍’ നിയമം ബാധകമായിരിക്കും. നിയമലംഘകര്‍ക്ക് 5,000 ഡോളര്‍ വരെ പിഴ ഈടാക്കും. പിഴ അടയ്ക്കാത്തവരെ അറസ്റ്റ് ചെയ്യുമെന്നും കൗണ്‍സിലര്‍മാര്‍ വ്യക്തമാക്കി.