ഒൻ്റാരിയോ കാലിഡോണിയയില്‍ കാറുകള്‍ കൂട്ടിയിടിച്ചുണ്ടായ അപകടത്തില്‍ പത്തനംതിട്ട കോഴഞ്ചേരി സ്വദേശി കപില്‍ രഞ്ജി തമ്പാന്‍ മരിച്ചു. ബഹ്‌റൈനില്‍ നിന്ന് സെപ്റ്റംബറിൽ കാനഡയിലേക്ക് കുടിയേറിയ, സംഗീതജ്ഞനും സൗണ്ട് എന്‍ജിനീയറുമായ കപിൽ ഹാമില്‍ട്ടണിലാണ് താമസം.
ചൊവ്വാഴ്ച ഉച്ചകഴിഞ്ഞ് മൂന്നരയോടെ കാലിഡോണിയയിലെ ഹൈവേ 6 ന് സമീപമുള്ള ആര്‍ഗൈല്‍ സ്ട്രീറ്റ് സൗത്തിലാണ് അപകടം നടന്നത്. ഗുരുതരമായി പരിക്കേറ്റ കപിലിനെ ആശുപത്രിയിൽ എത്തിക്കുന്നത് മുന്നേ മരിച്ചതായി സ്ഥിരീകരിച്ചു. കാറിലെ സഹയാത്രികനെയും ഗുരുതരമായ പരുക്കുകളോടെ ആശുപത്രിയില്‍ പ്രവേശിപ്പിച്ചു.
അതേസമയം അപകടത്തില്‍ ഉള്‍പ്പെട്ട എസ്യുവിയുടെ ഡ്രൈവറെ സാരമായ പരുക്കുകളോടെ ആശുപത്രിയില്‍ പ്രവേശിപ്പിച്ചു. വെസ്റ്റ് റീജിയന്‍ ഒപിപി ട്രാഫിക് ഇന്‍സിഡന്റ് മാനേജ്മെന്റ് എന്‍ഫോഴ്സ്മെന്റ് ടീം ആണ് അപകടത്തെക്കുറിച്ച് അന്വേഷിക്കുന്നത്.
