2025 മൂന്നാം പാദത്തിൽ (ജൂലൈ മുതൽ സെപ്റ്റംബർ വരെ) 54.1 കോടി ഡോളറിന്റെ നഷ്ടം രേഖപ്പെടുത്തിയതായി കാനഡ പോസ്റ്റ്. ഇത് കമ്പനിയുടെ ചരിത്രത്തിലെ ഏറ്റവും വലിയ ത്രൈമാസ നഷ്ടമാണ്. ഇതോടെ, 2025-ലെ ആദ്യ ഒൻപത് മാസങ്ങളിലെ മൊത്തം പ്രവർത്തന നഷ്ടം 100 കോടി ഡോളർ കവിഞ്ഞു. കാനഡ പോസ്റ്റ് നിലവിൽ ‘പാപ്പരാണെ’ന്നും (effectively insolvent) ഈ വർഷം ഏറ്റവും വലിയ വാർഷിക നഷ്ടത്തിലേക്ക് പോകുമെന്നും ചീഫ് ഫിനാൻഷ്യൽ ഓഫീസർ അറിയിച്ചു.
കത്തുകളുടെ എണ്ണത്തിലുണ്ടായ വലിയ കുറവും, പാഴ്സൽ വിതരണത്തിലെ കടുത്ത മത്സരവും കാരണമുണ്ടായ വിപണി പങ്കാളിത്തത്തിലെ ഇടിവുമാണ് പ്രധാന നഷ്ടകാരണങ്ങൾ. കൂടാതെ ജീവനക്കാരുമായുള്ള നിലവിലുള്ള തൊഴിൽ തർക്കങ്ങളും പണിമുടക്കുകളും നഷ്ടം വർധിപ്പിച്ചു. ഈ സാഹചര്യത്തിൽ, അടുത്ത ദശകത്തിനുള്ളിൽ വിരമിക്കലിലൂടെയും മറ്റുമായി ഏകദേശം 30,000 ജീവനക്കാരെ കുറയ്ക്കാനാണ് കമ്പനി ലക്ഷ്യമിടുന്നത്. പ്രവർത്തനങ്ങൾ മുന്നോട്ട് കൊണ്ടുപോകാൻ ഫെഡറൽ സർക്കാർ അനുവദിച്ച വായ്പയുടെ വലിയൊരു ഭാഗം കമ്പനി ഈ പാദത്തിൽ ഉപയോഗിച്ചിരുന്നു.
