സാല്‍മൊണെല്ല മലിനീകരണ സാധ്യതയുള്ള സലാമി കഴിച്ചതിനെ തുടര്‍ന്ന് രാജ്യത്തുടനീളം 72 പേര്‍ അസുഖബാധിതരായതായി കനേഡിയന്‍ ഫുഡ് ഇന്‍സ്‌പെക്ഷന്‍ ഏജന്‍സി. സാല്‍മൊണെല്ല അണുബാധയെ തുടര്‍ന്ന് റിയ ബ്രാന്‍ഡായ ജെനോവ സലാമി സ്വീറ്റ്, റിയ ബ്രാന്‍ഡായ ജെനോവ സലാമി ഹോട്ട്, ബോണ ബ്രാന്‍ഡായ മൈല്‍ഡ് ജെനോവ സലാമി എന്നിവ ഹെല്‍ത്ത് കാനഡ തിരിച്ചു വിളിച്ചിരുന്നു. രോഗബാധിതരില്‍ 57 പേര്‍ ആല്‍ബര്‍ട്ടയിലും 14 പേര്‍ ഒന്റാരിയോയിലും ഒരാള്‍ മാനിറ്റോബയിലുമാണ്. ഏപ്രില്‍ പകുതി മുതല്‍ ജൂണ്‍ പകുതി വരെ തയ്യാറാക്കിയ സലാമി കഴിച്ചവരില്‍ മിക്ക ആളുകളും രോഗബാധിതരായതെന്ന് ഫെഡറല്‍ ഹെല്‍ത്ത് ഏജന്‍സി റിപ്പോര്‍ട്ട് ചെയ്തു.
സാല്‍മൊണെല്ല കലര്‍ന്ന ഭക്ഷണം കേടായതായി അനുഭവപ്പെടുകയോ ചീത്ത മണം ഉണ്ടാവുകയോ ഇല്ല. എന്നാല്‍, കൊച്ചുകുട്ടികള്‍, ഗര്‍ഭിണികള്‍, പ്രായമായവര്‍, രോഗപ്രതിരോധശേഷി കുറഞ്ഞവര്‍ എന്നിവര്‍ക്ക് ഗുരുതരവും ചിലപ്പോള്‍ മാരകവുമായ അണുബാധകള്‍ക്ക് കാരണമാകുമെന്ന് ഏജന്‍സി മുന്നറിയിപ്പ് നല്‍കി. സാല്‍മൊണെല്ലയുടെ ലക്ഷണങ്ങളില്‍ പനി, തലവേദന, ഛര്‍ദ്ദി, ഓക്കാനം, വയറുവേദന, വയറിളക്കം എന്നിവ ഉള്‍പ്പെടാം.
