കാനഡക്കാർ അമേരിക്കൻ ബഹിഷ്‌കരണം ശക്തമാക്കിയതോടെ യുഎസിലേക്കുള്ള റോഡ് യാത്രകൾ തുടർച്ചയായ ഏഴാം മാസവും കുറഞ്ഞു. യുഎസിൽ നിന്നുള്ള കനേഡിയക്കാരുടെ റോഡ് റിട്ടേൺ യാത്രകൾ ജൂലൈയിൽ ഒരു വർഷം മുമ്പുള്ളതിനേക്കാൾ 36.9 ശതമാനം കുറഞ്ഞുവെന്ന് സ്റ്റാറ്റിസ്റ്റിക്സ് കാനഡയുടെ കണക്കുകൾ വ്യക്തമാക്കുന്നു. യുഎസിൽ നിന്നും കാനഡയിലേക്ക് വിമാന യാത്ര ചെയ്യുന്നവരുടെ എണ്ണവും 25.8 ശതമാനം കുറഞ്ഞു.
അതേസമയം കനേഡിയൻമാർ മറ്റിടങ്ങളിലേക്ക് യാത്ര ചെയ്തതിനാൽ മറ്റ് രാജ്യങ്ങൾ സന്ദർശിച്ച് എത്തുന്നവരുടെ എണ്ണം 5.9 ശതമാനം വർദ്ധിച്ചു. കാനഡയുടെ ഏറ്റവും വലിയ വ്യാപാര പങ്കാളിയും ഒരുകാലത്ത് അവരുടെ പ്രിയപ്പെട്ട അവധിക്കാല ലക്ഷ്യസ്ഥാനവുമായിരുന്നു അമേരിക്ക. എന്നാൽ പുതിയ സാഹചര്യങ്ങളിൽ അമേരിക്കയോടുള്ള നീരസത്തെയാണ് യുഎസ് യാത്രയിലെ കുറവ് കാണിക്കുന്നത്. കനേഡിയൻ സമ്പദ്‌വ്യവസ്ഥ ഏറ്റവും മോശം സാഹചര്യങ്ങളിൽ നിന്ന് രക്ഷപ്പെട്ടെങ്കിലും, സ്റ്റീൽ, ഓട്ടോ തുടങ്ങിയ വ്യവസായങ്ങൾ പ്രതിസന്ധിയിലാണ്.
ട്രംപിൻ്റെ കുടിയേറ്റ നിയന്ത്രണ നടപടികൾ യുഎസിലേക്കുള്ള സന്ദർശകരെ വലയ്ക്കുമെന്ന ആശങ്ക കാനഡയിലും വർദ്ധിച്ചിട്ടുണ്ട്. ബന്ധത്തിലെ പിരിമുറുക്കങ്ങളെ തുടർന്ന്, ചില അമേരിക്കക്കാർ കാനഡ യാത്ര ഒഴിവാക്കുന്നതായും റിപ്പോർട്ടുണ്ട്. കാനഡയിലേക്കുള്ള യുഎസ് കാർ യാത്രകളുടെ എണ്ണം ഒരു വർഷം മുമ്പുള്ളതിനേക്കാൾ 7.4 ശതമാനമാണ് കുറഞ്ഞത്. യുഎസിൽ നിന്നുള്ള വിമാനയാത്രക്കാരുടെ എണ്ണത്തിൽ 0.7 ശതമാനം വർധനവുണ്ടായപ്പോൾ, മറ്റ് രാജ്യങ്ങളിൽ നിന്നുള്ളവരുടെ എണ്ണത്തിൽ 5.6 ശതമാനം വർധനവുണ്ടായി.
