ആൽബെർട്ട: ആൽബെർട്ടയിലെ ബാഡ്ലാൻഡ്സിൽ ഗവേഷണ വിദ്യാർത്ഥി പുതിയ ഇനം ദിനോസർ ഡ്രാഗൺഫ്ലൈ ഫോസിൽ കണ്ടെത്തി. കാൽഗറിയിൽ നിന്ന് ഏകദേശം 220 കിലോമീറ്റർ കിഴക്കും മെഡിസിൻ ഹാറ്റിൽ നിന്ന് 125 കിലോമീറ്റർ വടക്കുപടിഞ്ഞാറുമുള്ള ആൽബെർട്ടയിലെ ദിനോസർ പ്രൊവിൻഷ്യൽ പാർക്കിൽ ആണ് ഫോസിലൈസ് ചെയ്ത ഡ്രാഗൺഫ്ലൈയുടെ ചിറക് കണ്ടെത്തിയത്. ഇത് ഒരു പുതിയ ഇനമാണെന്നും തിരിച്ചറിഞ്ഞിട്ടുണ്ട്.
2023-ൽ മക്ഗിൽ സർവ്വകലാശാലയിൽ ബിരുദ വിദ്യാർത്ഥിയായിരുന്ന ആൻഡ്രെ മുള്ളറാണ് ഈ കണ്ടെത്തൽ നടത്തിയത്. ചരിത്രാതീത കാലത്തെ ഒരു പ്രാണിയെ കണ്ടെത്തുമെന്ന് ഒട്ടും പ്രതീക്ഷിച്ചിരുന്നില്ല എന്ന് മുള്ളർ പറഞ്ഞു. സസ്യ ഫോസിലുകൾ കണ്ടെത്തുന്നതിൽ ശ്രദ്ധ കേന്ദ്രീകരിച്ചിരിക്കുമ്പോഴാണ് അവിചാരിതമായി ഈ ഫോസിൽ കണ്ടെത്തിയത്. ആൽബെർട്ടയിലെ ബാഡ്ലാൻഡ്സിൻ്റെ ഭാഗമായ ദിനോസർ പ്രൊവിൻഷ്യൽ പാർക്കിന് ആ പേര് ലഭിച്ചത് കഴിഞ്ഞ നൂറ്റാണ്ടിൽ അവിടെ നിന്ന് കണ്ടെത്തിയ നിരവധി വൈവിധ്യമാർന്ന ദിനോസർ ഫോസിലുകളിൽ നിന്നാണ്. ഏകദേശം 80 ചതുരശ്ര കിലോമീറ്റർ വിസ്തൃതിയുള്ള ഈ പാർക്കിൽ 40-ലധികം വ്യത്യസ്ത ദിനോസർ ഇനങ്ങളെ കണ്ടെത്തിയിട്ടുണ്ട്.
