ഓട്ടവ : കാനഡയിലെ വാടകക്കാർക്ക് ചെറിയൊരു ആശ്വാസത്തിന് സാധ്യത. രാജ്യത്ത് ഈ വർഷം വാടകനിരക്ക് കുറയുമെന്ന് വിദഗ്ധർ. 2025-ൽ രാജ്യത്തുടനീളം കൂടുതൽ വീടുകൾ ലഭ്യമാകുന്നതോടെ പല നഗരങ്ങളിലും വാടകയിൽ കുറവ് ഉണ്ടാകുമെന്നാണ് പ്രതീക്ഷിക്കുന്നത്.

കോവിഡ് മഹാമാരിക്കാലത്തിന് ശേഷം കാനഡയിലെ പ്രധാന നഗരങ്ങളിൽ അടക്കം വാടകനിരക്ക് കുത്തനെ ഉയർന്നിരുന്നു. 2022-ൽ 12.1 ശതമാനവും 2023-ൽ 8.6 ശതമാനവുമാണ് വാടക വർധിച്ചത്. എന്നാൽ കഴിഞ്ഞ വർഷം അവസാനത്തോടെ 3.2% കുറഞ്ഞ് ശരാശരി വാടക 2109 ഡോളറിലെത്തിയിരുന്നു. ഇത് 17 മാസത്തെ ഏറ്റവും താഴ്ന്ന നിരക്കാണ്. അതേ സമയം വീട്ടുടമകൾ വാടകക്കാരെ ആകർഷിക്കാൻ കൂടുതൽ ആകർഷകമായ വാഗ്ദാനങ്ങളും നൽകുന്നുണ്ട്. ഉയരുന്ന ജീവിതച്ചെലവിനും സാമ്പത്തിക വെല്ലുവിളികൾക്കും ഒപ്പം ആളുകളുടെ കൊഴിഞ്ഞു പോക്കും വീടുകളുടെ ഡിമാൻഡ് കുറച്ചിട്ടുണ്ട്. ഇമ്മിഗ്രേഷൻ കുറയ്ക്കാനുള്ള സർക്കാർ തീരുമാനം ജനസംഖ്യയിലും പ്രതിഫലിച്ച് തുടങ്ങിയിട്ടുണ്ട്. ഇതിന് പുറമെ ബാങ്ക് ഓഫ് കാനഡ പലിശനിരക്ക് കുറച്ചതോടെ വായ്പയെടുത്ത് പുതിയ വീട് വാങ്ങുന്നവരുടെ എണ്ണവും കൂടിയതും വാടക കുറയാൻ കാരണമായിട്ടുണ്ട്.