കാനഡയിൽ അഭയാർഥികളോടുള്ള വിശ്വാസ്യത കുറയുന്നുവെന്ന് പുതിയ സർവ്വേ ഫലം. തങ്ങൾക്ക് അഭയാർഥികളെ വിശ്വാസമില്ലെന്നാണ് സർവ്വേയിൽ പങ്കെടുത്തവരിൽ ഏകദേശം 43 ശതമാനം പേരും അഭിപ്രായപ്പെട്ടത്. 36 ശതമാനം പേർ അഭയാർത്ഥികളെ വിശ്വസിക്കുന്നു എന്നും അഭിപ്രായപ്പെട്ടു. എന്നാൽ മറ്റ് കുടിയേറ്റക്കാരെ തങ്ങൾക്ക് കൂടുതൽ വിശ്വാസമാണെന്നും 46 ശതമാനം പേർ വ്യക്തമാക്കി. സ്ത്രീകളെക്കാൾ കൂടുതൽ പുരുഷന്മാരാണ് അഭയാർഥികളെ വിശ്വാസമില്ലെന്ന് അഭിപ്രായപ്പെട്ടത്. സ്വന്തം രാജ്യത്തെ പ്രശ്നങ്ങളിൽ നിന്ന് പലായനം ചെയ്ത് എത്തുന്നവരാണ് അഭയാർഥികൾ. എന്നാൽ കാനഡയിൽ സ്ഥിരമായി താമസിക്കാനായി വരുന്നവരാണ് കുടിയേറ്റക്കാർ.
ഈ വർഷം കാനഡയിൽ അഭയാർഥി അപേക്ഷകളുടെ എണ്ണത്തിൽ ഏകദേശം 33 ശതമാനത്തിൻ്റെ കുറവാണ് ഉണ്ടായിട്ടുള്ളത്. വർദ്ദിച്ച് വരുന്ന അവിശ്വാസമാണ് ഇതിന് കാരണമെന്നാണ് വിലയിരുത്തൽ. പല അഭയാർഥി അപേക്ഷകളും യഥാർത്ഥമോ സാധുതയുള്ളതോ അല്ലെന്നാണ് മിക്ക കനേഡിയൻ പൗരന്മാർ വിശ്വസിക്കുന്നതെഎന്ന് സർവ്വേ കാണിക്കുന്നു. മാധ്യമ വാർത്തകൾ ഉൾപ്പടെയുള്ള കാര്യങ്ങളാണ് ഇത്തരം അഭിപ്രായങ്ങളെ സ്വാധീനിക്കുന്നതെന്ന് അഭയാർഥികളെ പിന്തുണയ്ക്കുന്നവർ പറയുന്നു.
പുതുതായി വരുന്നവരെ സ്വാഗതം ചെയ്യുകയാണ് വേണ്ടതെന്നും, ഭിന്നിപ്പിന് പകരം ഐക്യത്തിനാണ് കാനഡ ആഹ്വാനം ചെയ്യുന്നതെന്നും അവർ പറയുന്നു. സാമ്പത്തിക കുടിയേറ്റവും അഭയാർഥി സംരക്ഷണവും കാനഡയുടെ കുടിയേറ്റ സംവിധാനത്തിൻ്റെ ഭാഗമാണെന്നും ഉദ്യോഗസ്ഥർ ഓർമ്മിപ്പിക്കുന്നു.
