നോവ സ്കോഷ്യയിലെ ട്രൂറോ മേഖലയിൽ ജൂനിയർ ഹോക്കി ടീമിലെ അംഗങ്ങൾക്കിടയിൽ നടന്ന ക്രൂരമായ റാഗിങ്ങുമായി ബന്ധപ്പെട്ട് മൂന്ന് ജൂനിയർ ഹോക്കി ടീം അംഗങ്ങളെ പോലീസ് അറസ്റ്റ് ചെയ്തു. ലൈംഗിക അതിക്രമം ഉൾപ്പെടെയുള്ള അതീവ ഗുരുതരമായ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. ഈ വിവരങ്ങൾ പുറത്തുവന്നതോടെ ബന്ധപ്പെട്ട ഹോക്കി ടീമിനെ പൂർണ്ണമായും അധികൃതർ സസ്പെൻഡ് ചെയ്തു.
കഴിഞ്ഞ ഒക്ടോബറിൽ നടന്ന ഒരു സ്വകാര്യ ടീം ഒത്തുചേരലിനിടെ താൻ ആക്രമിക്കപ്പെട്ടതായി ഒരു ടീം അംഗം നൽകിയ പരാതിയിലാണ് കൊൾചെസ്റ്റർ കൗണ്ടി ഡിസ്ട്രിക്റ്റ് ആർസിഎംപി അന്വേഷണം ആരംഭിച്ചത്. അന്വേഷണത്തിൽ മറ്റ് സ്ഥലങ്ങളിലും സമാനമായ അതിക്രമങ്ങൾ നടന്നതായും കൂടുതൽ സാക്ഷികൾ ഉണ്ടെന്നും പോലീസ് കണ്ടെത്തി. തുടർന്ന് കഴിഞ്ഞ ചൊവ്വാഴ്ചയാണ് മൂന്ന് പ്രതികളെയും പോലീസ് കസ്റ്റഡിയിലെടുത്തത്. ഒന്നാം പ്രതിക്കെതിരെ ലൈംഗിക അതിക്രമം, ആയുധം ഉപയോഗിച്ചുള്ള ലൈംഗിക അതിക്രമം, മർദ്ദനം എന്നീ കുറ്റങ്ങൾ ചുമത്തി. രണ്ടാമത്തെ താരത്തിനെതിരെ ലൈംഗിക അതിക്രമത്തിന് പുറമെ ഉപദ്രവത്തിനും കേസ് രജിസ്റ്റർ ചെയ്തു. മൂന്നാം പ്രതിക്കെതിരെ ആയുധം ഉപയോഗിച്ചുള്ള ലൈംഗിക അതിക്രമത്തിനാണ് കേസെടുത്തിരിക്കുന്നത്. കാനഡയിലെ യുവജന ക്രിമിനൽ നീതി നിയമം പ്രകാരം പ്രതികളുടെ പേരുവിവരങ്ങൾ പോലീസ് വെളിപ്പെടുത്തിയിട്ടില്ല.
