പഞ്ചാബി ഗായകൻ അമി വിർക്കിന്‍റെ വാഹനം കാനഡയിൽ ആക്രമിക്കപ്പെട്ടു. ബ്രിട്ടീഷ് കൊളംബിയയിലുള്ള അബ്ബോട്‌സ്‌ഫോർഡിലാണ് സംഭവം. സെപ്റ്റംബർ 5-ന് രാത്രി 11 മണിയോടെ അബ്ബോട്‌സ്‌ഫോർഡിലെ റോജേഴ്‌സ് ഫോറത്തിൽ നടന്ന സംഗീത പരിപാടിക്ക് ശേഷം മടങ്ങുന്നതിനിടെയാണ് ആക്രമണമുണ്ടായത്. തങ്ങൾ സുരക്ഷിതരാണെന്ന് അമി വിർക്കിന്‍റെ പിതാവ് കുൽജീത് സിങ് അറിയിച്ചു.
ഇരുണ്ട നിറത്തിലുള്ള എസ്‌യുവിയിലെത്തിയ സംഘം അബ്ബോട്‌സ്‌ഫോർഡിലെ മക്കല്ലം റോഡിലൂടെ സഞ്ചരിക്കുകയായിരുന്ന വാഹനത്തിന് നേരെ വെടിയുതിർക്കുകയായിരുന്നു. ആർക്കും പരുക്കേറ്റിട്ടില്ല. വെടിവെപ്പിന് പിന്നാലെ സമീപ പ്രദേശത്ത് ഒരു എസ്‌യുവി പൂർണ്ണമായും കത്തിനശിച്ച നിലയിൽ കണ്ടെത്തിയിട്ടുണ്ട്. ഈ സംഭവത്തിന് വെടിവെപ്പുമായി ബന്ധമുണ്ടോയെന്ന് പരിശോധിച്ചുവരികയാണ്. വെടിവെപ്പിനെക്കുറിച്ച് എന്തെങ്കിലും വിവരം ലഭിക്കുന്നവരോ പ്രദേശത്തെ ഡാഷ്‌ക്യാം ദൃശ്യങ്ങൾ ഉള്ളവരോ അന്വേഷണ ഉദ്യോഗസ്ഥരുമായി ബന്ധപ്പെടണമെന്ന് അബോട്ട്‌സ്‌ഫോർഡ് പോലീസ് അഭ്യർത്ഥിച്ചു.
