“പോളാർ വോർട്ടെക്സ്” പ്രതിഭാസത്തെ തുടർന്ന് ഒൻ്റാരിയോയിൽ അടുത്ത മാസം കഠിനമായ തണുപ്പ് അനുഭവപ്പെടുമെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകുന്നു. സാധാരണയായി ആർട്ടിക് മേഖലയിൽ തങ്ങിനിൽക്കുന്ന അതിശൈത്യമായ വായുവിന്റെ ഒരു വലിയ ചുഴലിക്കാറ്റാണ് പോളാർ വോർട്ടെക്സ്. പോളാർ വോർട്ടെക്സ് ദുർബലമാവുകയും അതിന്റെ തണുത്ത വായു തെക്കൻ പ്രദേശങ്ങളിലേക്ക് നീങ്ങുകയും ചെയ്യുന്നതാണ് ഒന്റാരിയോയിൽ തണുപ്പ് കൂടാനുള്ള കാരണം. ഡിസംബറിൽ കാനഡയുടെ ചില ഭാഗങ്ങളിൽ കടുത്ത തണുപ്പ് അനുഭവപ്പെടാൻ സാധ്യതയുണ്ട്. ഒൻ്റാരിയോയിലും ഈ തണുപ്പ് അനുഭവപ്പെടുമെന്ന് കാലാവസ്ഥാ നിരീക്ഷകർ പറയുന്നു. അപൂർവ്വമായ ഈ കാലാവസ്ഥാ മാറ്റം കണക്കിലെടുത്ത്, ഒൻ്റാരിയോയിലെ താമസക്കാർ വരും ആഴ്ചകളിൽ കൂടുതൽ ജാഗ്രത പാലിക്കേണ്ടതുണ്ട്.
ഈ പ്രതിഭാസം ഒൻ്റാരിയോയിലെ താപനില ഗണ്യമായി കുറയ്ക്കും. കാറ്റിന്റെ തണുപ്പും കൂടി കണക്കിലെടുക്കുമ്പോൾ താപനില നെഗറ്റീവ് ഇരട്ട അക്കങ്ങളിലേക്ക് എത്താൻ സാധ്യതയുണ്ട്. കൂടാതെ, കൂടുതൽ മഞ്ഞുവീഴ്ച സംഭവിക്കാനും സാധ്യതയുണ്ട്. ഇത് തടാകങ്ങൾക്ക് സമീപമുള്ള പ്രദേശങ്ങളിൽ കൂടുതൽ മഞ്ഞ് വീഴാൻ കാരണമാകും. എത്രനാൾ ഈ തണുപ്പ് നീണ്ടുനിൽക്കുമെന്ന് ഇപ്പോൾ പറയാനാകില്ലെങ്കിലും ഡിസംബറിലെ ഭൂരിഭാഗം ദിവസങ്ങളിലും ഇത് തുടർന്നേക്കാം.
കൊടുംതണുപ്പിനെ നേരിടാൻ ഒൻ്റാരിയോ നിവാസികൾ പ്രത്യേക ശ്രദ്ധ പതിപ്പിക്കണമെന്ന് അധികൃതർ നിർദ്ദേശിച്ചു.
ശീതകാല വസ്ത്രങ്ങൾ: തണുപ്പിൽ നിന്നും രക്ഷ നേടാൻ വേണ്ട ജാക്കറ്റുകൾ, തൊപ്പികൾ, കയ്യുറകൾ എന്നിവയെല്ലാം തയ്യാറാക്കി വെക്കുക.
വാഹന ടയറുകൾ: വാഹനങ്ങളിൽ ശീതകാല ടയറുകൾ (Winter Tires) മാറ്റിയിടുന്നത് സുരക്ഷിതമായിരിക്കും.
നിരീക്ഷണവും ശ്രദ്ധയും : അടുത്ത ദിവസങ്ങളിലെ കാലാവസ്ഥാ പ്രവചനങ്ങൾ ശ്രദ്ധിക്കുകയും അതിനനുസരിച്ച് പ്രവർത്തിക്കുകയും ചെയ്യുക.
