ബോണി ക്രോംബി രാജി പ്രഖ്യാപിച്ചതോടെ പുതിയ ലീഡറെ തിരഞ്ഞെടുക്കാനുള്ള നടപടികൾ ആരംഭിച്ച് ഒൻ്റാരിയോ ലിബറൽ പാർട്ടി. നേതൃത്വ മത്സരത്തിന് മേൽനോട്ടം വഹിക്കുന്നതിനായി “ലീഡർഷിപ്പ് വോട്ട് കമ്മിറ്റി” രൂപീകരിക്കുന്നതിന് അംഗീകാരം നൽകിയതായി പാർട്ടി എക്സിക്യൂട്ടീവ് കൗൺസിൽ അറിയിച്ചു. അഞ്ച് വർഷത്തിനിടെ ഒൻ്റാരിയോ ലിബറൽ പാർട്ടിയുടെ മൂന്നാമത്തെ നേതൃത്വ മത്സരമാണിത്. നേതൃത്വ അവലോകനത്തിൽ 57 ശതമാനം വോട്ടുകൾ ലഭിച്ചെങ്കിലും ബോണി ക്രോംബി രാജിവെച്ചതോടെയാണ് നേതൃത്വ മത്സരത്തിന് തുടക്കമായത്.
പാർട്ടി ട്രഷറർ ഗബ്രിയേൽ സെകാലി അധ്യക്ഷനാകുന്ന കമ്മിറ്റിയിൽ പ്രസിഡൻ്റ് മക്ഗാരി, എക്സിക്യൂട്ടീവ് വൈസ് പ്രസിഡൻ്റ് ഡേവിഡ് ഫാരോ എന്നിവരും ഉൾപ്പെടുന്നു. ഏറ്റവും കാര്യക്ഷമമായി നേതൃത്വ തിരഞ്ഞെടുപ്പ് എങ്ങനെ നടത്താം എന്നതിനെക്കുറിച്ച് പാർട്ടി അംഗങ്ങളിൽ നിന്നും വിവരങ്ങൾ ശേഖരിക്കുന്നതിനായി സർവേ നടത്തും. ന്യായവും, ആകർഷകവും, എളുപ്പത്തിൽ ആക്സസ് ചെയ്യാവുന്നതുമായ നേതൃത്വ വോട്ട് എങ്ങനെ ഉറപ്പാക്കാം എന്നതിനെക്കുറിച്ച് OLP അംഗങ്ങളിൽ നിന്ന് ഫീഡ്ബാക്ക് ശേഖരിക്കുന്നതിനായി കമ്മിറ്റി സർവേ സംഘടിപ്പിക്കുമെന്ന് പാർട്ടി പറയുന്നു.
