പ്രവിശ്യയിലെ ആരോഗ്യമേഖലയില്‍ മാറ്റങ്ങള്‍ വരുത്താനുള്ള നീക്കങ്ങള്‍ താല്‍ക്കാലികമായി നിര്‍ത്തിവെച്ചതായി ന്യൂ ബ്രണ്‍സ്വിക്ക് പ്രീമിയര്‍ സൂസന്‍ ഹോള്‍ട്ട്. വ്യക്തതയും കൂടിയാലോചനയും ആവശ്യപ്പെട്ട് നഴ്സുമാരുടെ യൂണിയന് രംഗത്തെത്തിയതിനെ തുടര്‍ന്നാണിത്. ഹൊറൈസണ്‍ ഹെല്‍ത്ത് നെറ്റ്വര്‍ക്കിലെ മാനസിക, പൊതുജനാരോഗ്യ വിഭാഗങ്ങളിലെ ജീവനക്കാരുടെ നിയമനങ്ങളില്‍ മാറ്റം വരുത്താനുള്ള പദ്ധതിയാണ് നിര്‍ത്തിവെച്ചത്. മതിയായ കൂടിയാലോചനകള്‍ നടക്കുന്നത് വരെ ഈ പ്രവര്‍ത്തനങ്ങള്‍ നിര്‍ത്തിവെക്കാന്‍ താന്‍ ആവശ്യപ്പെട്ടതായി പ്രീമിയര്‍ സൂസന്‍ ഹോള്‍ട്ട് സോഷ്യല്‍ മീഡിയയിലൂടെ അറിയിച്ചു.
ഈ മാറ്റങ്ങളെക്കുറിച്ച് ആശങ്കയുണ്ടെന്ന് പറഞ്ഞ അവര്‍, യൂണിയനുമായി കൂടിയാലോചനകള്‍ നടത്താതെയാണ് ഹൊറൈസണ്‍ ഈ പദ്ധതി അവതരിപ്പിച്ചതെന്നും വ്യക്തമാക്കി. ആസൂത്രണം ചെയ്ത മാറ്റങ്ങള്‍ കാരണം ആര്‍ക്കും ജോലി നഷ്ടമാകില്ലെന്ന് മെയ് മാസത്തില്‍ സൂസന്‍ ഹോള്‍ട്ട് ഉറപ്പു നല്‍കിയിരുന്നു.
അതേസമയം, പദ്ധതിയെ യൂണിയന് പിന്തുണച്ചതായി ഹൊറൈസണ്‍ തെറ്റായി പ്രചരിപ്പിച്ചുവെന്ന് നഴ്സസ് യൂണിയന് പ്രസിഡന്റ് പൗല ഡൗസെറ്റ് ആരോപിച്ചു. ഈ പദ്ധതിയെക്കുറിച്ച് യൂണിയന് യാതൊരു വിവരവും നല്‍കിയിട്ടില്ലെന്നും അവര്‍ കൂട്ടിച്ചേര്‍ത്തു.
