യുഎസ്-കാനഡ വ്യാപാരയുദ്ധം തുടരുമ്പോഴും, ഒൻപത് മാസമായി വിൽപ്പന നിർത്തിവെച്ച യുഎസ് മദ്യത്തിന്റെ ബാക്കിയുള്ള ശേഖരം വിറ്റഴിക്കാൻ അനുമതി നൽകി നോവ സ്കോട്ടിയ സർക്കാർ. പ്രവിശ്യാ സർക്കാർ ഇതിനകം പണം നൽകി വാങ്ങിയ ഈ ഉൽപ്പന്നങ്ങൾ പാഴാക്കിക്കളയാൻ ആഗ്രഹിക്കുന്നില്ലെന്ന് പ്രീമിയർ ടിം ഹ്യൂസ്റ്റൺ അറിയിച്ചു. 1.4 കോടി ഡോളർ മൂല്യമുള്ള അമേരിക്കൻ മദ്യശേഖരമാണ് പ്രവിശ്യയിലെ നോവസ്കോഷ ലിക്വർ കോർപ്സിന്റെ (NSLC) ഗോഡൗണുകളിലുള്ളത്. ഈ സ്റ്റോക്ക് വിറ്റഴിച്ച് കഴിയുന്നതോടെ യുഎസിൽ നിന്ന് ഇനി മദ്യം ഓർഡർ ചെയ്യില്ലെന്നും പ്രീമിയർ വ്യക്തമാക്കി. ഡിസംബർ 1 മുതൽ യുഎസ് മദ്യങ്ങൾ വിൽപ്പനയ്ക്ക് ലഭ്യമാകും. ഈ ശേഖരം വിറ്റഴിക്കാൻ ‘നിരവധി മാസങ്ങൾ’ എടുക്കുമെന്നാണ് പ്രതീക്ഷിക്കുന്നത്.
യുഎസ് മദ്യവിൽപ്പനയിൽ നിന്ന് ലഭിക്കുന്ന അറ്റാദായം (ഏകദേശം 40 ലക്ഷം ഡോളർ) Feed Nova Scotia ഉൾപ്പെടെയുള്ള ജീവകാരുണ്യ സംഘടനകൾക്ക് നൽകും. ട്രംപ് ഭരണകൂടം കനേഡിയൻ ഉൽപ്പന്നങ്ങൾക്ക് തീരുവ ഏർപ്പെടുത്തിയതിനെത്തുടർന്ന് മാർച്ചിലാണ് പ്രവിശ്യയിലെ ഷെൽഫുകളിൽ നിന്ന് യുഎസ് നിർമിത മദ്യം നീക്കം ചെയ്തത്. ഈ നടപടി യുഎസിൽ നിന്നുള്ള മദ്യവിൽപ്പനയെ കാര്യമായി ബാധിച്ചു. 2025-ന്റെ രണ്ടാം പാദത്തിൽ കാനഡയിലെ യുഎസ് വൈൻ വിൽപ്പന 91 ശതമാനവും മറ്റ് മദ്യങ്ങളുടെ വിൽപ്പന 85 ശതമാനവും ഇടിഞ്ഞിരുന്നു.
