ഒൻ്റാരിയോയിൽ വാഹന ഉടമകൾക്കും വാടകകർക്കും അടക്കം അനുകൂലമായ പുതിയ നിയമപരിഷ്കാരങ്ങൾ പ്രാബല്യത്തിൽ വന്നു. കടുത്ത ഉഷ്ണതരംഗം തുടരുന്നതിനിടയിൽ, ഒൻ്റാരിയോയിലെ വാടകക്കാർക്ക് എയർ കണ്ടീഷണർ സ്ഥാപിക്കാനുള്ള അവകാശം ഉറപ്പുനൽകുന്ന പുതിയ നിയമം ജൂലൈ ഒന്നു മുതൽ നിലവിൽ വന്നു. 2023-ലെ നിയമ ഭേദഗതി പ്രകാരം, ഭൂവുടമകൾ എസി സൗകര്യം നൽകാത്ത പക്ഷം വ്യവസ്ഥകൾക്ക് വിധേയമായി വാടകക്കാർക്ക് വിൻഡോ എസികളോ പോർട്ടബിൾ യൂണിറ്റുകളോ സ്ഥാപിക്കാനും ഉപയോഗിക്കാനും സാധിക്കും. കാനഡ ദിനത്തോട് അനുബന്ധിച്ച് പ്രവിശ്യയിൽ നടപ്പിലാക്കിയ നിരവധി നിയമ-നിയന്ത്രണ പരിഷ്കാരങ്ങളിൽ പ്രധാനപ്പെട്ട ഒന്നാണിത്. ആരോഗ്യ മേഖലയിലും മോട്ടോർ ഇൻഷുറൻസ് രംഗത്തും വലിയ മാറ്റങ്ങളാണ് ഇതോടൊപ്പം പ്രവിശ്യയിൽ പ്രാബല്യത്തിൽ വന്നിരിക്കുന്നത്. പൊതു ധനസഹായത്തോടെയുള്ള വൻകുടൽ കാൻസർ രോഗനിർണ്ണയ പരിശോധനയ്ക്കുള്ള പ്രായപരിധി 50-ൽ നിന്ന് 45 വയസ്സായി കുറച്ചു. ഫാർമസിസ്റ്റുകൾക്ക് ലഘുവായ ആരോഗ്യപ്രശ്നങ്ങൾ പരിശോധിച്ച് ചികിത്സിക്കാനും കൂടുതൽ വാക്സിനുകൾ വിതരണം ചെയ്യാനും പുതിയ ഉത്തരവിലൂടെ അനുമതി ലഭിച്ചിട്ടുണ്ട്.
അതേസമയം, വാഹന ഇൻഷുറൻസ് മേഖലയിൽ ചില ആക്സിഡൻ്റ് ബെനഫിറ്റുകൾ നിർത്തലാക്കി. ഇതോടെ പ്രീമിയം തുക ലാഭിക്കാൻ വാഹന ഉടമകൾക്ക് അവസരമൊരുക്കി. എന്നാൽ, ഭാവിയിൽ ഉണ്ടാകാനിടയുള്ള ഗുരുതരമായ അപകടങ്ങളിൽ ഇത് വലിയ സാമ്പത്തിക ബാധ്യതയ്ക്ക് കാരണമാകുമെന്ന് ഇൻഷുറൻസ് വിദഗ്ദ്ധർ മുന്നറിയിപ്പ് നൽകുന്നു.
ഡ്രൈവിംഗ് ലൈസൻസ് നടപടിക്രമങ്ങളിലും കുറ്റകൃത്യങ്ങൾ തടയുന്നതിലും കർശനമായ നിയന്ത്രണങ്ങളാണ് ഫോർഡ് സർക്കാർ കൊണ്ടുവന്നിരിക്കുന്നത്. പ്രവിശ്യയുമായി ലൈസൻസ് എക്സ്ചേഞ്ച് കരാറില്ലാത്ത അധികാരപരിധികളിൽ നിന്ന് എത്തുന്ന ഡ്രൈവർമാർ ഇനി മുതൽ G2 റോഡ് ടെസ്റ്റ് നേടിയ ശേഷം, പൂർണ്ണമായ ‘G’ ലൈസൻസിനായി കുറഞ്ഞത് ഒരു വർഷമെങ്കിലും കാത്തിരിക്കണം.
കൂടാതെ, ജാമ്യത്തുക കുടിശ്ശിക വരുത്തുന്നവരിൽ നിന്ന് തുക ഈടാക്കാൻ ധനമന്ത്രാലയത്തിന് സ്വത്തുക്കൾ കണ്ടുകെട്ടാനും ബാങ്ക് അക്കൗണ്ടുകൾ മരവിപ്പിക്കാനുമുള്ള അധികാരം നൽകിയിട്ടുണ്ട്. പൊതുഗതാഗത സംവിധാനങ്ങളിൽ മയക്കുമരുന്ന് ഉപയോഗിക്കുന്നവരെ അറസ്റ്റ് ചെയ്യാൻ ട്രാൻസിറ്റ് സ്പെഷ്യൽ കോൺസ്റ്റബിൾമാർക്ക് അധികാരം നൽകുന്നതും നിയമമായി.
