അരിസോണ (യുഎസ്): പ്രശസ്ത ടിവി അവതാരക സവാന ഗത്രിയുടെ (Savannah Guthrie) മാതാവ് നാൻസി ഗത്രിയെ (84) തട്ടിക്കൊണ്ടുപോയ സംഭവത്തിൽ അന്വേഷണം ഊർജിതമാക്കി എഫ്.ബി.ഐ. പ്രതിയെന്ന് സംശയിക്കുന്ന വ്യക്തിയെക്കുറിച്ചുള്ള കൂടുതൽ വിവരങ്ങളും സിസിടിവി ദൃശ്യങ്ങളും എഫ്.ബി.ഐ പുറത്തുവിട്ടു. വിവരങ്ങൾ നൽകുന്നവർക്കുള്ള പ്രതിഫലം ഒരു ലക്ഷം യുഎസ് ഡോളറായി (ഏകദേശം 83 ലക്ഷം രൂപ) വർദ്ധിപ്പിച്ചു. പ്രതിക്ക് ഏകദേശം 5 അടി 9 ഇഞ്ച് മുതൽ 5 അടി 10 ഇഞ്ച് വരെ ഉയരമുണ്ടാകുമെന്ന് എഫ്.ബി.ഐ അറിയിച്ചു. സംഭവസമയത്ത് ഇയാൾ മുഖംമൂടി ധരിച്ചിരുന്നു. ‘Ozark Trail Hiker Pack’ എന്ന ബ്രാൻഡിന്റെ 25 ലിറ്റർ ബ്ലാക്ക് ബാക്ക്പാക്ക് ആണ് ഇയാൾ ധരിച്ചിരുന്നത്.

ഫെബ്രുവരി ഒന്നിന് നാൻസി ഗത്രിയെ കാണാതായ രാത്രിയിൽ, അവരുടെ വീടിന്റെ മുൻവാതിലിലെ ഡോർബെൽ ക്യാമറയിൽ ഒരു മുഖംമൂടി ധരിച്ച വ്യക്തിയുടെ ദൃശ്യങ്ങൾ പതിഞ്ഞിരുന്നു. ഇയാൾ ക്യാമറ നശിപ്പിക്കാൻ ശ്രമിക്കുന്നതും ദൃശ്യങ്ങളിൽ കാണാം.നാൻസിയുടെ വീടിന് ചുറ്റുമുള്ള 3 കിലോമീറ്റർ പരിധിയിലുള്ള താമസക്കാരോട് അവരുടെ വീടുകളിലെ സിസിടിവി ദൃശ്യങ്ങൾ പരിശോധിക്കാനും ജനുവരി മുതൽ എന്തെങ്കിലും സംശയാസ്പദമായ വാഹനങ്ങളോ ആളുകളോ ശ്രദ്ധയിൽപ്പെട്ടിട്ടുണ്ടോ എന്ന് അറിയിക്കാനും അധികൃതർ ആവശ്യപ്പെട്ടു.

84 വയസ്സുള്ള നാൻസിക്ക് കൃത്യമായി മരുന്നുകൾ ആവശ്യമാണ്. മരുന്നുകൾ ലഭിക്കാത്തത് അവരുടെ ജീവന് ഭീഷണിയായേക്കാം എന്ന ആശങ്കയിലാണ് കുടുംബവും അധികൃതരും. “ഞങ്ങൾ ഒരിക്കലും പ്രതീക്ഷ കൈവിടില്ല. നിങ്ങളുടെ പ്രാർത്ഥനകൾക്ക് നന്ദി,” എന്ന് സവാന ഗത്രി സോഷ്യൽ മീഡിയയിൽ കുറിച്ചു. മോചനദ്രവ്യം നൽകാൻ തയ്യാറാണെന്ന് കുടുംബം നേരത്തെ അറിയിച്ചിരുന്നു. പീമ കൗണ്ടി ഷെരീഫ് ഡിപ്പാർട്ട്‌മെന്റും എഫ്.ബി.ഐയും സംയുക്തമായാണ് അരിസോണയിലെ ട്യൂസൺ മേഖലയിൽ തിരച്ചിൽ നടത്തുന്നത്. ആയിരക്കണക്കിന് വിവരങ്ങളാണ് ഇതിനോടകം പൊതുജനങ്ങളിൽ നിന്ന് ലഭിച്ചിട്ടുള്ളതെന്ന് എഫ്.ബി.ഐ വ്യക്തമാക്കി.