തായ്‌ലൻഡിലെ ബാങ്കോക്കിൽ മലയാളി യുവാവിനെ മരിച്ച നിലയിൽ കണ്ടെത്തി. ആലപ്പുഴ തലവടി ഗ്രാമപഞ്ചായത്തിലെ ആമപ്രാമ്പൽ തെക്ക് പുന്നശ്ശേരി സ്വദേശി പ്രജിത് പുഷ്പാംഗദന്‍റെ (49) മൃതദേഹമാണ് ബാങ്കോക്കിലെ ലോഡ്ജ് മുറിയിൽ നിന്നും കണ്ടെത്തിയത്. പാസ്പോർട്ട് വിലാസത്തിൽ നടത്തിയ അന്വേഷണത്തിലാണ് പ്രജിത്തിനെ തിരിച്ചറിഞ്ഞത്.
യുകെയിൽ അധ്യാപകനായിരുന്ന പ്രജിത്, അവധിക്കാലം ആഘോഷിക്കാനാണ് തായ്‌ലൻഡിലെത്തിയത്. പതിവായി വിദേശയാത്രകൾ നടത്താറുള്ള പ്രജിത് തായ്‌ലൻഡിലെത്തിയത് ഒറ്റക്കാണ്. മരണത്തിൽ മറ്റ് ദുരൂഹതകളുണ്ടോ എന്നതടക്കമുള്ള കാര്യങ്ങളിൽ തായ് അധികൃതരും പൊലീസും നിലവിൽ അന്വേഷണം നടത്തിവരികയാണ്. മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങളും സംഭവത്തിലെ തുടരന്വേഷണങ്ങളും പുരോഗമിക്കുകയാണ്.
