കാനഡയിൽ സാങ്കേതിക സംവിധാനം വഴിയുള്ള വിസ പ്രോസസിംഗ് കാരണം വിസ നിരസിക്കൽ കൂടുന്നതായി നിയമ വിദഗ്ദ്ധർ. ഇത് ഏറെ ആശങ്കയുളവാക്കുന്നുണ്ടെന്നും അവർ അഭിപ്രായപ്പെട്ടു. അപേക്ഷകൾ ഉദ്യോഗസ്ഥർ പരിശോധിക്കുന്നുണ്ടോ എന്ന് പോലും സംശയമുണ്ടെന്നും കുടിയേറ്റ നിയമ വിദഗ്ധർ പറഞ്ഞു. Immigration, Refugees and Citizenship Canada (IRCC) ഉപയോഗിക്കുന്ന സാങ്കേതിക വിദ്യയാണ് വിസ നിരസിക്കൽ വർദ്ധിക്കുന്നതിനുള്ള കാരണമായി ഇവർ ചൂണ്ടിക്കാട്ടുന്നത്.

ഇതിന് ഉദാഹരണമായി നിരവധി സംഭവങ്ങൾ പലരും ചൂണ്ടിക്കാട്ടുന്നുണ്ട്. ഒരു അപേക്ഷയിൽ ജനന സർട്ടിഫിക്കറ്റ് ചേർത്തിട്ടുണ്ടെങ്കിലും, “ജനന സർട്ടിഫിക്കറ്റ് നൽകിയിട്ടില്ല” എന്ന കാരണത്താൽ അപേക്ഷ നിരസിക്കപ്പെട്ടതായി ടൊറന്റോയിലെ കുടിയേറ്റ അഭിഭാഷകൻ മാരിയോ ബെല്ലിസിമോ പറയുന്നു. യഥാർത്ഥത്തിൽ എന്താണ് പരിശോധിക്കപ്പെടുന്നത് എന്നതാണ് തൻ്റെ വലിയ ആശങ്കയെന്നു ബെല്ലിസിമോ പറഞ്ഞു. IRCC കമ്പ്യൂട്ടർ സഹായത്തോടെയാണ് അപേക്ഷകൾ വേഗത്തിൽ പ്രോസസ്സ് ചെയ്യുന്നതെന്ന് അധികൃതർ സമ്മതിക്കുന്നുണ്ട്. എന്നാൽ അന്തിമ തീരുമാനം കമ്പ്യൂട്ടർ അല്ല ഉദ്യോഗസ്ഥരാണ് എടുക്കുന്നതെന്നും അവർ പറയുന്നു. നിരസിക്കപ്പെട്ട അപേക്ഷകർക്ക് വിശദമായ മറുപടി നൽകുന്നുണ്ടെന്നും വകുപ്പ് വ്യക്തമാക്കി.