കാൽഗറിയുടെ ടെക്നോളജി മേഖലക്ക് കരുത്ത് പകർന്ന്, പ്രമുഖ ഐ.ടി. കമ്പനിയായ എച്ച്.സി.എൽ.ടെക് നഗരത്തിൽ പ്രവർത്തനം തുടങ്ങുന്നു. ദി ആംപർസാൻഡ് കോംപ്ലക്‌സിൽ ആണ് ഓഫീസ് പ്രവർത്തനം ആരംഭിച്ചത്. കാൽഗരിയിലെ ക്ലയൻ്റുകളുമായി സഹകരിച്ച് ഇന്നോവേറ്റീവ് ടെക്നോളജി സൊല്യൂഷൻസ് വികസിപ്പിക്കുക എന്ന ലക്ഷ്യത്തോടെയാണ് ഈ പുതിയ കേന്ദ്രം സ്ഥാപിച്ചിരിക്കുന്നത്. ഈ വിപുലീകരണം പ്രാദേശിക തലത്തിൽ തൊഴിലവസരങ്ങൾ സൃഷ്ടിക്കാനും ആൽബർട്ടയുടെ സമ്പദ്‌വ്യവസ്ഥയെ ശക്തിപ്പെടുത്താനും കാനഡയുടെ ടെക്നോളജി രംഗം വളർത്താനും സഹായിക്കുമെന്നാണ് പ്രതീക്ഷിക്കുന്നത്.
കാൽഗറിയിലെ ഐ.ടി. മേഖലയുടെ വളർച്ചാ സാധ്യതകൾക്ക് കൂടുതൽ ഊർജ്ജം പകരുന്നതാണ് ഇത്. അടുത്തിടെ കാൽഗറിയിൽ പ്രവർത്തനം ആരംഭിക്കുന്ന അഞ്ചാമത്തെ ഇന്ത്യൻ ഐ.ടി. കമ്പനിയാണ് എച്ച്.സി.എൽ.ടെക്. AI, സൈബർ സുരക്ഷ, ഡാറ്റ എന്നിവയിൽ കൂടുതൽ ശ്രദ്ധ കേന്ദ്രീകരിക്കാനാണ് എച്ച്.സി.എൽ.ടെക് ലക്ഷ്യമിടുന്നത്. ആവശ്യമായ വൈദഗ്ധ്യമുള്ള തൊഴിലാളികൾ കാൽഗറിയിൽ ഉണ്ടെന്നും, കമ്പനികൾക്ക് വേഗത്തിൽ വളരാൻ കഴിയുന്ന മികച്ച സ്ഥലമാണ് കാൽഗറിയെന്നും ഈ പുതിയ നിക്ഷേപം തെളിയിക്കുന്നതായി ഇൻവെസ്റ്റ് ആൽബർട്ടയുടെ സി.ഇ.ഒ. പറഞ്ഞു.
