കുഞ്ഞുങ്ങള്‍ക്കായി കാത്തിരിക്കുന്ന ബ്രിട്ടിഷ് കൊളംബിയയിലെ ദമ്പതിമാര്‍ക്കൊരു സന്തോഷവാർത്ത. പ്രവിശ്യാ സർക്കാരിന്‍റെ ധനസഹായത്തോടെ പ്രവര്‍ത്തിക്കുന്ന ഇന്‍-വിട്രോ ഫെര്‍ട്ടിലൈസേഷന്‍(IVF) പ്രോഗ്രാമിലേക്ക് അപേക്ഷകള്‍ സ്വീകരിച്ചുതുടങ്ങിയതായി ബ്രിട്ടിഷ് കൊളംബിയ സർക്കാർ അറിയിച്ചു. ഐവിഎഫ് വഴി ഗര്‍ഭം ധരിക്കാന്‍ ശ്രമിക്കുന്ന പ്രവിശ്യയിലെ ആയിരക്കണക്കിന് ആളുകൾക്ക് ഈ പ്രോഗ്രാമിലൂടെ 19,000 ഡോളർ വരെ ലഭിക്കും. ഐവിഎഫ് ചികിത്സയ്ക്കും മരുന്നുകളുടെ ചെലവുകള്‍ക്കും ഈ ധനസഹായം പിന്തുണയേകും.

ജൂലൈ 2 ബുധനാഴ്ച മുതല്‍ പ്രവിശ്യയിലുടനീളമുള്ള ഫെര്‍ട്ടിലിറ്റി ക്ലിനിക്കുകള്‍ അര്‍ഹരായവരുടെ അപേക്ഷകള്‍ സ്വീകരിക്കാന്‍ തുടങ്ങി. മെഡിക്കല്‍ സര്‍വീസസ് പ്ലാനില്‍ (എംഎസ്പി) ഉള്ള പ്രവിശ്യാ നിവാസികളായിരിക്കണം അപേക്ഷകർ. കൂടാതെ അപേക്ഷിക്കുന്ന സമയത്ത് 41 വയസ്സോ അതില്‍ കുറവോ ആയിരിക്കണം പ്രായം. 250,000 ഡോളറില്‍ താഴെ വരുമാനമുള്ളവര്‍, 100,000 ഡോളറോ അതില്‍ കുറവോ വരുമാനമുള്ളവര്‍ എന്നിവര്‍ക്ക് പൂര്‍ണ ധനസഹായം ലഭിക്കും.