ഇസ്രയേല് നടത്തിയ ആക്രമണങ്ങളില് അമേരിക്കയ്ക്കും പങ്കുണ്ടെന്ന് ആരോപിച്ച് ഇറാന് രംഗത്ത്. അമേരിക്കന് പിന്തുണയോടെ ഇസ്രായേല് നടത്തിയ ഈ ആക്രമണങ്ങള്ക്ക് കനത്ത തിരിച്ചടി നല്കുമെന്ന് ഇറാന് സൈനിക വക്താവ് ബ്രിഗേഡിയര് ജനറല് ഷെക്കാര്ച്ചി വ്യക്തമാക്കി.
എന്നാല്, ഇസ്രയേലിന്റെ ആക്രമണത്തെക്കുറിച്ച് അറിവുണ്ടായിരുന്നെങ്കിലും അതില് പങ്കില്ലെന്ന് പറഞ്ഞ് അമേരിക്കന് പ്രസിഡന്റ് ഡോണള്ഡ് ട്രംപും രംഗത്തെത്തി. ഇറാനുമായുള്ള ആണവ ചര്ച്ചകള് തുടരുമെന്നും ട്രംപ് വ്യക്തമാക്കി. ആക്രമണത്തില് പങ്കില്ലെന്ന് അമേരിക്ക ആവര്ത്തിക്കുമ്പോഴാണ് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു ട്രംപിന് നന്ദി അറിയിച്ച് രംഗത്തെത്തിയത്. ആക്രമണത്തിന് ശേഷം നടത്തിയ വീഡിയോ സന്ദേശത്തിലാണ് നെതന്യാഹു ട്രംപിന് നന്ദി അറിയിച്ചത്.
എന്നാല് ആക്രമണത്തില് പങ്കില്ലെന്ന് ഡോണള്ഡ് ട്രംപ് ആവര്ത്തിച്ചു പറയുന്നുണ്ട്. ഇറാന് അണുബോംബ് ഉണ്ടാക്കാന് കഴിയില്ലെന്നും അവര് ചര്ച്ചാ മേശയിലേക്ക് മടങ്ങിയെത്തുമെന്ന് താന് പ്രതീക്ഷിക്കുന്നതായും ട്രംപ് പറഞ്ഞു.
ഇറാന് തലസ്ഥാനമായ ടെഹ്റാനിലേക്ക് ഇസ്രയേല് നടത്തിയ വ്യോമാക്രമണത്തില് ഇറാന്റെ സംയുക്ത സൈനിക മേധാവി മുഹമ്മദ് ബാഗേരിയും ഇറാന് റെവല്യൂഷണറി ഗാര്ഡ് കോര് (ഐആര്ജിസി) മേധാവി ഹൊസൈന് സലാമിയും കൊല്ലപ്പെട്ടിരുന്നു.
ഇസ്രയേല് ആണവ ലക്ഷ്യങ്ങള് തകര്ത്തതായി പറഞ്ഞ ആക്രമണങ്ങളില് നിരവധി കമാന്ഡര്മാരും ശാസ്ത്രജ്ഞരും കൊല്ലപ്പെട്ടതായി ഖമേനി സ്ഥിരീകരിച്ചു. മാത്രമല്ല ജനവാസ കേന്ദ്രങ്ങള്ക്ക് നേരെയായിരുന്നു ആക്രമണമെന്നും ഖമേനി അറിയിച്ചു. അതിനാല് ഇറാന് ഇസ്രയേലിന് കനത്ത തിരിച്ചടി നല്കുമെന്ന് അദ്ദേഹംവ്യക്തമാക്കി.
