രാജ്കോട്ട്: ലോകരാജ്യങ്ങൾ കടുത്ത സാമ്പത്തിക-രാഷ്ട്രീയ അസ്ഥിരതകളിലൂടെ കടന്നുപോകുമ്പോഴും ഇന്ത്യ തികഞ്ഞ ആത്മവിശ്വാസത്തോടെയും സ്ഥിരതയോടെയും മുന്നേറുകയാണെന്ന് പ്രധാനമന്ത്രി നരേന്ദ്ര മോദി. ഗുജറാത്തിലെ രാജ്കോട്ടിൽ ‘വൈബ്രന്റ് ഗുജറാത്ത്’ പ്രാദേശിക ഉച്ചകോടി ഉദ്ഘാടനം ചെയ്യുകയായിരുന്നു അദ്ദേഹം. നയപരമായ വ്യക്തതയും രാഷ്ട്രീയ സുസ്ഥിരതയുമാണ് ആഗോള പ്രതിസന്ധികൾക്കിടയിലും ഇന്ത്യയെ സുരക്ഷിതമാക്കുന്നതെന്ന് പ്രധാനമന്ത്രി ചൂണ്ടിക്കാട്ടി. മധ്യവർഗത്തിന്റെ വികാസവും വർദ്ധിച്ചുവരുന്ന ക്രയശേഷിയും ആഭ്യന്തര വിപണിക്ക് പുതിയ ഉണർവ് നൽകുന്നതായും പ്രധാനമന്ത്രി കൂട്ടിച്ചേർത്തു.
ലോകത്തെ പ്രമുഖ സമ്പദ്വ്യവസ്ഥകളിൽ പലതും മുരടിപ്പിനെ നേരിടുമ്പോൾ ഇന്ത്യ അതിവേഗ വളർച്ച നിലനിർത്തുന്നത് ശ്രദ്ധേയമാണ്. രാജ്യം വൈകാതെ തന്നെ ലോകത്തെ മൂന്നാമത്തെ വലിയ സാമ്പത്തിക ശക്തിയായി മാറുമെന്നും അദ്ദേഹം ആവർത്തിച്ചു. അയൽരാജ്യങ്ങളിലടക്കം നിലനിൽക്കുന്ന അനിശ്ചിതാവസ്ഥകൾ പരോക്ഷമായി പരാമർശിച്ച പ്രധാനമന്ത്രി, ലോകം ആശങ്കയോടെ ഉറ്റുനോക്കുന്ന കാലഘട്ടത്തിൽ ഇന്ത്യ പ്രതീക്ഷയുടെ കേന്ദ്രമായി മാറിയെന്ന് വ്യക്തമാക്കി.
നിക്ഷേപ സൗഹൃദമായ നയങ്ങളും ഡിജിറ്റൽ രംഗത്തെ കുതിപ്പും ഉൽപ്പാദന മേഖലയിലെ മുന്നേറ്റവും രാജ്യത്തിന്റെ കരുത്താണ്. ‘പരിഷ്കരണം, പ്രകടനം, പരിവർത്തനം’ (Reform, Perform, Transform) എന്ന ലക്ഷ്യത്തിലൂന്നിയുള്ള പ്രവർത്തനങ്ങളാണ് ഇന്ത്യയെ ആഗോളതലത്തിൽ മുൻനിരയിലെത്തിച്ചത്.
