നോവ സ്കോട്ടിയയിൽ ഈ വർഷം ക്രിസ്മസ് ട്രീ വിൽപ്പനയിൽ വലിയ വർധന ഉണ്ടായതായി റിപ്പോർട്ട്. ക്രിസ്മസിന് ദിവസങ്ങൾ മാത്രം ബാക്കിനിൽക്കെ ഹാലിഫാക്സിലെ മിക്ക കടകളിലും ട്രീകൾ ഇതിനോടകം വിറ്റുതീർന്നതായും റിപ്പോർട്ടുകൾ സൂചിപ്പിക്കുന്നു. മുൻവർഷത്തെ അപേക്ഷിച്ച് പ്രാദേശിക വിപണിയിൽ 10 ശതമാനത്തിലധികം വർധന ഉണ്ടായതായി ക്രിസ്മസ് ട്രീ കൗൺസിൽ ഓഫ് നോവ സ്കോട്ടിയ പ്രസിഡന്റ് മൈക്ക് ഹാർലോ അറിയിച്ചു.
കുറഞ്ഞ വിലയിൽ ഗുണമേന്മയുള്ള മരങ്ങൾ ലഭ്യമാകുന്നത് ഉപഭോക്താക്കളെ ആകർഷിക്കുന്ന പ്രധാന ഘടകമാണ്. പ്രാദേശിക വിപണിയിൽ മുന്നേറ്റമുണ്ടായെങ്കിലും അമേരിക്ക ഉൾപ്പെടെയുള്ള അന്താരാഷ്ട്ര വിപണിയിൽ ആവശ്യക്കാരുടെ എണ്ണത്തിൽ കുറവ് രേഖപ്പെടുത്തിയിട്ടുണ്ട്. യുഎസ് വിപണിയിലെ സാമ്പത്തിക അനിശ്ചിതത്വം കാരണം ചില വൻകിട സ്റ്റോറുകളിൽ ട്രീയുടെ ഓർഡറിൽ 40 ശതമാനം വരെ ഇടിവുണ്ടായതായി മൈക്ക് ഹാർലോ ചൂണ്ടിക്കാട്ടി. ഇത് നോവ സ്കോട്ടിയയിലെ മൊത്തം ഉൽപ്പാദനത്തെ ബാധിക്കുന്ന ഗൗരവകരമായ സാഹചര്യമാണെന്നും അദ്ദേഹം വിലയിരുത്തി.
പ്രവിശ്യയിൽ വർഷം തോറും വെട്ടിമാറ്റുന്ന എട്ട് മുതൽ ഒമ്പത് ലക്ഷം വരെ മരങ്ങളിൽ 80 ശതമാനവും അമേരിക്കയിലേക്കാണ് കയറ്റുമതി ചെയ്യുന്നത്. അമേരിക്കൻ വിപണിയിലെ തളർച്ച കണക്കിലെടുത്ത് ഏഷ്യൻ രാജ്യങ്ങൾ, തെക്കേ അമേരിക്ക, കരീബിയൻ ദ്വീപുകൾ എന്നിവിടങ്ങളിലേക്ക് വിപണി വ്യാപിപ്പിക്കാൻ കർഷകർ ശ്രമം തുടങ്ങിയതായി കൗൺസിൽ അറിയിച്ചു. പുതിയ വിപണികൾ കണ്ടെത്തുന്നതിലൂടെ കയറ്റുമതി രംഗത്തെ പ്രതിസന്ധി പരിഹരിക്കാനാവുമെന്നാണ് അധികൃതരുടെ പ്രതീക്ഷ.
