ഓട്ടവ : മലിനീകരണ സാധ്യതയെ തുടർന്ന് മലബന്ധ ചികിത്സയ്ക്ക് ഉപയോഗിക്കുന്ന പെഗ്ലൈറ്റ് പൗഡർ (Peglyte Powder) കനേഡിയൻ വിപണിയിൽ നിന്നും തിരിച്ചുവിളിച്ചതായി ഹെൽത്ത് കാനഡ അറിയിച്ചു. 260303, 260304, 260305, 260306 എന്നീ ലോട്ട് നമ്പറുകളുള്ള പെൻഡോഫാം ബ്രാൻഡ് പെഗ്ലൈറ്റ് പൗഡറുകളാണ് തിരിച്ചുവിളിച്ചവ.
ഉപഭോക്താക്കൾ തങ്ങളുടെ ഉൽപ്പന്നം തിരിച്ചുവിളിച്ച ലോട്ടുകളിൽ പെട്ടതാണോ എന്ന് പരിശോധിക്കണം. പെൻഡോഫാം ബ്രാൻഡ് പെഗ്ലൈറ്റ് പൗഡറുകൾ ഉപയോഗിക്കുന്നവർ അവയുടെ ഉപയോഗം നിർത്തുന്നതിന് മുമ്പ് ഡോക്ടറുമായി ബന്ധപ്പെടണം. കൂടാതെ ആരോഗ്യ പ്രശ്നങ്ങൾ നേരിടുന്നവർ വൈദ്യോപദേശം തേടണമെന്നും ഹെൽത്ത് കാനഡ നിർദ്ദേശിച്ചു. പെഗ്ലൈറ്റ് പൗഡറുകളുമായി ബന്ധപ്പെട്ട പരാതികൾ ഹെൽത്ത് കാനഡയുടെ ഓൺലൈൻ റിപ്പോർട്ടിങ് സംവിധാനത്തിലൂടെ അറിയിക്കാം.








